28 кастрычніка ў касцёле Узвышэння Святога Крыжа ў Вілейцы адбылося свята паляўнічых, рыбаловаў і леснікоў з нагоды ўспаміну іх апекуна – св. Губерта. Набажэнства ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч.
Звяртаючыся ў гаміліі да духавенства, а таксама прысутных паляўнічых, рыбаловаў, леснікоў і ўсіх вернікаў, арцыбіскуп адзначыў, што стала ўжо добрай традыцыяй праводзіць гэтую сустрэчу ўвосень з нагоды ўспаміну св. Губерта, які адзначаецца ў Каталіцкім Касцёле 3 лістапада.
Сёння ж, як дадаў іерарх, Касцёл адзначае свята свв. апосталаў Сымона і Юды Тадэвуша, якія разам абвяшчалі Божае слова ў Персіі і там загінулі мучаніцкай смерцю. Мітрапаліт нагадаў, што апостал Юда Тадэвуш з’яўляецца аўтарам аднаго з Пасланняў Новага Запавету.
“Езус, паклікаўшы галілейскіх рыбакоў быць Яго апосталамі, сказаў, што яны стануць лаўцамі душ чалавечых. Рыбаловы і паляўнічыя з’яўляюцца лаўцамі рыб і дзікіх звяроў. Але кожны чалавек моцаю хросту таксама павінен быць апосталам. Гэта азначае, што сведчаннем свайго хрысціянскага жыцця ён павінен спрыяць евангелізацыі і ўмацаванню веры і гэтым самым з’яўляецца лаўцом душ людзей”, - звярнуў увагу Мітрапаліт.
Па словах іерарха, практыка палявання і рыбалоўства можа ў гэтым дапамагчы. Арцыбіскуп прывёў пяць спосабаў таго, “як перанесці паляўнічы і рыбалоўны досвед у практыку духоўнага жыцця”.
Найперш, як адзначыў Мітрапаліт, трэба ўзброіцца цярплівасцю: “Каб занятак паляўнічых і рыбаловаў быў паспяховым, яны павінны быць цярплівымі. Часам трэба сядзець у засадзе некалькі гадзін, пакуль не з’явіцца доўгачаканы звер, або доўга-доўга глядзець на паплавок, пакуль ён не пакажа, што рыба клюе. (…) Не заўсёды і не адразу абвяшчэнне Евангелля прыносіць свой плён. (…) Таму неабходна вучыцца ў паляўнічых, рыбаловаў і леснікоў і цярпліва, без суму, сваім хрысціянскім сведчаннем несці Добрую Навіну ў свет”.
Наступнай справай, працягваў Мітрапаліт, з’яўляецца паўтарэнне: “Нягледзячы на тое, што нярэдка паляўнічыя ці рыбаловы з палявання ці рыбалкі прыходзяць ні з чым і часта вельмі змучаныя, тым не менш яны не адмаўляюцца ад свайго любімага занятку і хобі. (…) Евангелізацыя таксама патрабуе пастаяннай працы і пастаяннага паўтарэння. Нават нягледзячы на адсутнасць вынікаў, нельга паддавацца і неабходна ісці наперад”.
Далей арцыбіскуп звярнуў увагу на тое, што паляванне, рыбалка і праца ў лесе – “гэта цяжкая праца”: “У іх абавязкі ўваходзіць абслугоўванне паляўнічых ці рыбацкіх прыладаў, папаўненне кармушак, доўгае хаджэнне па полі ці лесе, чаканне ў засадзе ці над вадой і г.д. Падобна і з евангелізацыяй. Без сістэматычнай працы не ўдасца дасягнуць адпаведных вынікаў”.
Акрамя таго, адзначыў іерарх, “паляванне, рыбалка і лясніцтва патрабуюць ахвяры”: “Каб паляванне ці рыбалка былі паспяховымі, неабходна адмовіцца ад сну і адпачынку, бо трэба рана ўстаць і ісці ў не заўсёды спрыяльнае надвор’е ў лес ці на раку. (…) Падобна і з абвяшчэннем Божага слова. Апостал павінен вучыць у час і не ў час, як кажа св. апостал Павел – гэта азначае тады, калі яго слухаюць, і тады, калі не хочуць слухаць”.
І нарэшце, заўважыў Мітрапаліт, “паляванне, рыбалка і лясныя працы ніколі не завяршаюцца”. “Паляўнічыя, рыбаловы і леснікі добра ведаюць, што іх могуць чакаць неспрыяльныя ўмовы надвор’я і нават небяспека, але не перастаюць займацца сваім любімым заняткам. (…) Падобна павінна быць і абвяшчэннем Добрай Навіны, якой чакаюць людзі. Яно ніколі не можа завяршыцца, бо кожны чалавек і ў кожных абставінах патрабуе Божага слова і ласкі”, - патлумачыў арцыпастыр.
Віншуючы паляўнічых, рыбаловаў і леснікоў са святам іх апекуна св. Губерта, арцыбіскуп Кандрусевіч пажадаў, каб яны падобна “праз сваё хобі знайшлі Бога і жылі Ягонай праўдай”.
У завяршэнне свята вернікі вілейскай парафіі павіншавалі арцыпастыра з днём яго святога апекуна, затым адбылося ўручэнне памятных адзначэнняў членам супольнасці паляўнічых і благаслаўленне транспартных сродкаў.
Святы Губерт нарадзіўся ў VII стагоддзі ў Францыі ў шляхетнай сям’і. З маладосці вельмі цікавіўся паляваннем. Спачатку паводзіў сябе вольна з маральнага пункту гледжання, шмат часу прысвячаў пошукам задавальненняў і паляванню. Аднойчы ў Вялікую пятніцу ён, не захоўваючы павагі да смерці Хрыста, пайшоў на паляванне. Там яму аб’явіўся алень са ззяючым паміж рагоў крыжам. Губерт пачуў словы: “Ты вельмі шмат часу прысвячаеш справам гэтага свету. Памятай, што мэта чалавека зусім іншая”. Гэта быў пераломны момант у жыцці Губерта. Ён змяніў жыццё і стаў святаром, пазней біскупам, абвяшчаў Евангелле сярод вернікаў і язычнікаў, вылучаўся глыбокай малітвай, захаваннем посту і дабрачыннасцю. Яго ўспамін адзначаецца 3 лістапада.
