Пра гэта ўзгадалі родныя Ігната Дамейкі 31 ліпеня ў Чырвоным касцёле, дзе цэлебравалася св. Імша з нагоды 215-годдзя ўраджэнца Беларусі.
Ініцыятарам распачацця працэсу аб бэатыфікацыі Ігната Дамейкі быў Франсіско-Хаўер Эрасурыс Осса папярэдні арцыбіскуп архідыяцэзіі Сант'яга-дэ-Чылі. Падрыхтоўчыя працы да распачацця працэсу ідуць з 1996 года.
Дамейка — даследчык-геолаг, мінеролаг, нацыянальны герой Чылі. Ён нарадзіўся 31 ліпеня 1802 года, у дзень успаміну святога Ігнацыя Лаёлы ў мястэчку Вялікая Мядведка Наваградскага павета.
З 1812 года разам з братам Адамам вучыўся ў школе ордэна піяраў у Шчучыне. Пасля паступіў у Віленскі ўніверсітэт, дзе далучыўся да дзейнасці Таварыства філаматаў і філарэтаў. У 1830 годзе ён выехаў у Літву, а потым у Польшчу і Германію.
У 1834 годзе Ігнат Дамейка паступіў у Горную школу ў Парыжы. У 1837 годзе ён склаў геалагічную, гідраграфічную і гаспадарчую мапы былой Рэчы Паспалітай. У 1837 годзе навуковец прыняў прапанову чылійскага ўраду і падпісаў кантракт на пасаду выкладчыка горнай школы Ля Сэрэна ў горадзе Какімба.
Члены сям’і Ігната Дамейкі прыехалі ў Беларусь для ўдзелу ў навуковай канферэнцыі «Геалогія і мінеральныя рэсурсы Захада Усходне-Еўрапейскай платформы», прысвечанай юбілею Ігната Дамейкі, у Акадэміі навук Беларусі.
«Мне вельмі прыемна бачыць партрэт Ігната Дамейкі ў касцёле і абраз Божай Маці, перад якім ён маліўся. Дон Ігнацыё быў добрым мужам і сем’янінам, таму ў яго ў Чылі шмат нашчадкаў, сям’я даволі вялікая, — распавядае праўнучка Дамейкі сен’ёра Паз.
Апошнія 20 гадоў я прысвяціла даследванню жыцця майго прадзеда. Пра яго я напісала кнігу на іспанскай мове, якая была выдадзеная ў Чылі і перавыдадзена па-англійску ў Аўстраліі, дзе я жыву.
Презентацыя кнігі адбудзецца гэтымі днямі ў Мінску. У кнізе я імкнулася паказаць паўнату яго асобы. Ён быў рамантыкам і адначасова рэлігійнай асобай, навукоўцам, добрым бацькам. Таму ў Чылі і ў іншых кутках свету жывуць шмат яго праўнукаў».
Памяць у Чылі
У Чылі вельмі шануюць памяць пра Ігната Дамейку. Яго імем названы вулканічны ланцуг гор у Андах, мінэрал дамейкіт, фіялкавая кветка (віёла дамейкона, Viola domeykana), шэраг аб’ектаў тапанімікі і грамадскіх установаў па ўсім свеце.
У Чылі ёсць невялікае мястэчка Дамейка ў адміністрацыйным рэгіёне Атакама, паміж гарадамі Ла-Сэрэна і Вальенар, у якім жыве каля тысячы жыхароў. У гонар Дамейкі названыя вуліцы ў Санцьяга дэ Чылі, Вальпараіса і яшчэ ў васьмі гарадах Чылі, а таксама ў Вільні, Мінску і Навагрудку.
