У нядзелю 5 верасня, адначасова з адкрыццём 52-а міжнароднага Эўхарыстычнага кангрэсу, у сталіцы Венгрыі распачала працу штогадовая сустрэча іерархаў усходніх каталіцкіх Касцёлаў з еўрапейскіх краін.
Па запрашэнні першаіерарха Венгерскай Грэка-каталіцкай Царквы Мітрапаліта Філіпа Кочыша сёлетняя сустрэча праходзіць у Будапешце падчас 52-а міжнароднага Эўхарыстычнага Кангрэсу. Сустрэчу курыруюць Кангрэгацыя Усходніх Касцёлаў і Рада Канферэнцый Біскупаў Еўропы.
Як паведамляецца на сайце грэка-каталіцкай парафіі святога праведнага Язэпа ў Мінску Svjazep.org, у межах сустрэчы іерархі ўсходніх каталіцкіх Касцёлаў сірыйскай, армянскай і візантыйскай традыцый з еўрапейскіх краін будуць абмяркоўваць тэалагічныя, душпастырскія і кананічныя аспекты праграмы «Эўхарыстыя і сінадальнасць».
Тэму «Практычныя аспекты сінадальнасці» прадставіць 8 верасня першаіерарх Украінскай Грэка-Каталіцкай Царквы арцыбіскуп Кіева-Галіцкі Святаслаў Шаўчук.
5 верасня усходнія каталіцкія іерархі узялі ўдзел у адкрыцці Эўхарыстычнага Кангрэсу. Адным з важных момантаў гэтага міжнароднага форуму з стане Боская Літургія ў візантыйскім абрадзе, якая будзе цэлебравацца 8 верасня ў базыліцы святога Стэфана.
Ад Беларускай Грэка-Каталіцкай Царквы ў сустрэчы іерархаў і ў міжнародным Эўхарыстычным кангрэсе ўдзельнічае Апостальскі візітатар для грэка-католікаў Беларусі архімандрыт Сяргей Гаек.
