16 студзеня ў катэдральным касцёле Найсвяцейшага Імя Марыі ў Мінску прайшла катэхеза для моладзі на тэму адносін, выбару сужонка і стварэння сям’і.
Сустрэча адбылася ў дольным касцёле мінскай архікатэдры. Спікерамі гэтым разам сталі Алена і Андрэй Місан — сямейная пара з Мінска.
На мерапрыемства сабраліся больш за восем дзясяткаў дзяўчат і юнакоў з розных парафій сталіцы і наваколля, а таксама іх душпастыры.
Алена і Андрэй ужо 10 гадоў у сужэнстве і выхоўваюць чацвярых дзяцей. Алена працуе доктарам акушэрам-гінеколагам, а Андрэй — сістэмным архітэктарам і з’яўляецца заснавальнікам праекта Imsha.by, які дае магчымасць шырокаму кола карыстальнікаў даведацца пра актуальны час святой Імшы ў парафіях Мінска і многіх іншых мясцін Беларусі.
Сустрэча пачалася са сведчання Алены, якая падзялілася досведам сваёй працы ў гінекалогіі, распавяла пра маральныя прынцыпы, якіх яна прытрымліваецца, і пра тое, як сваімі паводзінамі стараецца сведчыць пра Бога.
Алена таксама дала парады па выбары мужа і расказала гісторыю свайго знаёмства з Андрэем.
Пасля Алены слова ўзяў Андрэй, які пастараўся падзяліцца з моладдзю тым, што хацеў бы пачуць сам у свае 25 гадоў, разважаючы з перспектывы 35-гадовага. Андрэй закрануў тэму захавання цноты чысціні, падзяліўся парадамі і разважаў пра крытэрыі гатоўнасці стаць добрым мужам і бацькам.
Пасля выступлення спікераў моладзь мела магчымасць задаць ім свае пытанні і атрымаць шчырыя адказы.
Адказны за душпастырства моладзі Мінска-Магілёўскай архідыяцэзіі ксёндз Андрэй Бурак выказаў удзячнасць сям’і Місан за шчырыя сведчанні, карысныя парады і цікавыя гісторыі, а таксама правёў супольную малітву.
Сустрэча завяршылася сяброўскай гарбатай, дзе маладыя людзі маглі пазнаёміцца і абмеркаваць пачутае.
Апошняя катэхеза з серыі сустрэч, тэму адносін, выбару сужонка і стварэння сям’і, адбудзецца 20 лютага ў мінскай архікатэдры.
- План мерапрыемстваў душпастырства моладзі ў Мінску на 2024/2025 катэхетычны год ТУТ>>>
