4 студзеня, у першую суботу Святога 2025 года, у Нацыянальным санктуарыі Маці Божай Будслаўскай прайшла чарговая, ужо чацвёртая сустрэча ў межах малітоўнай падрыхтоўкі да прысвячэння Мінска-Магілёўскай Мітраполіі Божай міласэрнасці і Беззаганнаму Сэрцу Марыі з нагоды юбілейнага года хрысціянства і 90-годдзя Вяночка да Божай міласэрнасці.
Гэтая падрыхтоўка адбываецца па ініцыятыве Мітрапаліта Мінска-Магілёўскага арцыбіскупа Юзафа Станеўскага.
За арганізацыю першай сёлетняй сустрэчы ў межах малітоўнай падрыхтоўкі былі адказныя духавенства і вернікі Вілейскага і Маладзечанскага дэканату.
Асаблівай інтэнцыяй сабраных у Нацыянальным санктуарыі ў першую суботу студзеня была малітва за ўсіх хрысціянаў.
Пілігрымаў з парафій Вілейшчыны і Маладзечаншчыны, а таксама з Мінска і іншых мясцін сардэчна прывітаў пробашч будслаўскай парафіі ксёндз Дзмітрый Дубовік.
Напачатку адбылося выстаўленне Найсвяцейшага Сакрамэнту і набажэнства перапрашэння Беззаганнага Сэрца Марыі з Фацімскім Ружанцам, які суправаджаўся разважаннямі з «Дзённіка» святой сястры Фаўстыны.
Цэлебрацыю святой Імшы ў межах сустрэчы ўзначаліў дэкан Маладзечанскі ксёндз прэлат, грэміяльны канонік Эдмунд Даўгіловіч Навіцкі. У канцэлебрацыі ўзялі ўдзел прысутныя святары з Вілейскага і Маладзечанскага дэканатаў, а таксама ксёндз прэлат, грэміяльны канонік Уладзіслаў Завальнюк.
Гамілію падчас Эўхарыстыі прамовіў ксёндз канонік Аляксандр Барыла, пробашч парафіі Узвышэння Святога Крыжа ў Вілейцы, а аскетычную канферэнцыю пасля Імшы на тэму Юбілейнага года хрысціянства — дэкан Вілейскі ксёндз Павел Слука MSF, пробашч парафіі святога Казіміра ў Лагойску.
Завяршылася першая сёлетняя малітоўная сустрэча ў Нацыянальным санктуарыі набажэнствам да Божай Міласэрнасці.
