16 лістапада, ва ўрачыстасць Найсвяцейшай Панны Марыі Вастрабрамскай, Маці Міласэрнасці, галоўнай Апякункі Гродзенскай дыяцэзіі, двое студэнтаў Вышэйшай духоўнай семінарыі ў Гродне былі ўстаноўленыя кандыдатамі да дыяканскага і прэзбітэрскага пасвячэння.
Як паведаміла Прэс-служба Гродзенскай дыяцэзіі, кандыдатамі да прыняцця сакрамэнту пасвячэння біскуп Гродзенскі Уладзімір Гуляй прызначыў Яраслава Казлоўскага з Гродзенскай дыяцэзіі і Андрэя Януля з Віцебскай дыяцэзіі. Абрад устанаўлення кандыдатаў адбыўся на ранішняй малітве ў капліцы Міждыяцэзіяльнай вышэйшай духоўнай семінарыі ў Гродне.
Біскуп Гуляй звярнуўся да новаўстаноўленых кандыдатаў з пастырскім словам, адзначыўшы асаблівую важнасць гэтага моманту ў семінарыйнай фармацыі.
Як заўважыў іерарх, стаць кандыдатам да пасвячэння — значыць атрымаць магчымасць яшчэ раз сказаць Богу «так». Вялікі магістр Міждыяцэзіяльнай семінарыі дадаў, што святарства сёння з’яўляецца «выклікам і адказнасцю».
Біскуп Уладзімір Гуляй пажадаў семінарыстам добра выкарыстаць час падрыхтоўкі да служэння.
