6 красавіка валанцёры суполкі Дабрачыннага каталіцкага таварыства Caritas з катэдральнай парафіі Найсвяцейшага Імя Марыі ў Мінску наведалі сталічны пансіянат для пажылых людзей, састарэлых і інвалідаў «Выток-Захад».
Для бабуль і дзядуляў, якія знаходзяцца там, валанцёры падрыхтавалі віншаванні з нагоды Дня пажылых людзей, а таксама невялікія падарункі. Іх суправаджаў ксёндз Аляксандр Фаміных, пробашч парафіі Багародзіцы Апякункі сем’яў у Ждановічах, на тэрыторыі якой знаходзіцца пансіянат.
У холе пансіянату валанцёры прадставілі канцэртную праграму, падчас якой гучалі песні і вершы ў выкананні Марыі Пянткоўскай. Віртуознай ігрой на саксафоне парадаваў пастаяльцаў пансіянату Сяргей Канавалаў, а пад жвавыя народныя матывы на цымбалах ў выкананні Кацярыны Гарашчанка слухачы пусціліся ў скокі.
Тых, хто не меў фізічнай магчымасці спусціцца ў хол, дзе праходзіў канцэрт, дзве групы валанцёраў наведалі ў палатах. Яны таксама парадавалі бабуль і дзядуляў сваімі вершамі, ігрой на інструментах і песнямі.
Усе ўдзельнікі захавалі ў душы цёплыя ўражанні ад гэтай сустрэчы, якая стала выразам спачування і клопату пра пажылых людзей.
Валанцёры пакінулі пансіянат, засвоіўшы адзін важны ўрок: несці любоў і дабрыню ў свет — гэта не толькі абавязак, але і вялікае шчасце.
