У Ватыкане апублікавалі душпастырскі дапаможнік да VI Сусветнага дня пажылых людзей, які будзе адзначацца ў Касцёле ў ліпені.
Дыкастэрыя па справах свецкіх, сям’і і жыцця падрыхтавала адмысловы душпастырскі дапаможнік да VI Сусветнага дня пажылых людзей. Ён змяшчае афіцыйную малітву, літургічныя рэкамендацыі і лагатып сустрэчы.
Свята прапануецца адзначыць праз урачыстую Эўхарыстыю і наведванне самотных старэйшых вернікаў. Асаблівая ўвага звяртаецца на тых, хто прыкаваны да ложка, каб ніхто не застаўся без суцяшэння.
Традыцыйна святкаванне адбываецца ў чацвёртую нядзелю ліпеня, блізка да ўспаміну святых Яўхіма і Ганны. Сёлета гэты дзень прыпадае якраз на 26 ліпеня, г. зн. у сам дзень успаміну. Аднак мясцовыя канферэнцыі біскупаў маюць права змяніць гэтую дату згодна з душпастырскімі патрэбамі. У кожнай дыяцэзіі біскупу прапануецца ўзначаліць набажэнства ў катэдральным касцёле.
Кардынал Кэвін Фарэл заклікаў старэйшае пакаленне святкаваць гэты дзень з радасцю. Кіраўнік Дыкастэрыі падкрэсліў:
«Усведамленне сябе дзецьмі ў любым узросце — гэта заклік для ўсіх пажылых людзей паглыбіць сваё пакліканне і адчуць сябе жывымі членамі хрысціянскай супольнасці».
Паводле яго слоў, яны застаюцца сааўтарамі сумеснай місіі Касцёла ў кожны перыяд жыцця.
Усе неабходныя матэрыялы даступныя для вольнага спампавання на афіцыйным сайце ведамства. Апостальская Сталіца запрашае каталіцкія супольнасці дзяліцца сваімі ініцыятывамі, выкарыстоўваючы адмысловы хэштэг #Elderlyandgrandparents.
