23 ліпеня, у Трэці Сусветны дзень бабуль, дзядуль і пажылых людзей, арцыбіскуп эмэрыт Тадэвуш Кандрусевіч узяў удзел у традыцыйнай адпустовай урачыстасці ў гонар святой Ганны ў касцёле святога Андрэя, апостала, у Лынтупах (Віцебская дыяцэзія, Пастаўскі дэканат).
Заслужаны іерарх узначаліў у лынтупскім касцёле цэлебрацыю Эўхарыстыі, падчас якой удзяліў сакрамэнт канфірмацыі 36-і мясцовым вернікам.
На пачатку Імшы арцыбіскуп Кандрусевіч падкрэсліў, што сёлета фэст у гонар святой Ганны адзначаецца ў Лынтупах у Трэці Сусветны дзень бабуль, дзядуль і пажылых людзей.
«Папа Францішак адзначае, што гэты дзень патрэбны Касцёлу і грамадству, бо перадае сучаснасці мінулае, неабходнае для будавання будучыні», — нагадаў словы Пантыфіка арцыпастыр. Ён таксама павіншаваў прысутных у касцёле старэйшых людзей з іх святам і пажадаў ім «Божага благаслаўлення, добрага здароў’я і радасці ад унукаў».
У гаміліі іерерх сцвердзіў, што «самай цудоўнай гісторыяй, якую толькі чуў свет, з’яўляецца Евангелле, прынцыпамі якога мы жывем і дзелімся з іншымі».
«Гэтую гісторыю пачала пісаць сям’я Ганны і Яўхіма. Плён іх сужэнскага саюза, якім стала Марыя, — гэта цуд спалучэння чалавечай малітвы з Божай ласкай. Маці Збаўцы мела бацькоў, якія былі ўзорам любові і самаахвярнасці, трываласці і малітвы, а таксама клопату пра належнае духоўнае выхаванне дзіцяці.
Без бацькоўскіх намаганняў святой Ганны і святога Яўхіма не было б Той, якую Арханёл Габрыэль прывітаў, назваўшы „поўнаю ласкі“. Гэта сведчанне таго, што моцныя Богам бацькі выхоўваюць духоўна моцных дзяцей, здольных згаджацца з Божай воляй», — адзначыў арцыбіскуп Кандрусевіч, дадаўшы, што менавіта «вера бацькоў выхоўвае веру дзяцей».
«Гэта самае вялікае пасланне сённяшняга свята святой Ганны. Бог адчыняе нам брамы неба праз сям’ю, якая сёння знаходзіцца ў глыбокім крызісе, адной з праяўваў якога з’яўляецца праблема выхавання маладога чалавека.
Новыя часы патрабуюць новага чалавека, выхаванага на старых і заўсёды новых прынцпах Евангелля. У гэтым працэсе галоўная роля належыць сям’і. Сэрца маці і бацькі — гэта самая лепшая школа дзя дзіцяці», — сцвердзіў арцыбіскуп Тадэвуш Кандрусевіч.
