З 19 па 24 жніўня ў Друі (Віцебская дыяцэзія, Мёрскі дэканат) праходзіў мастацкі пленэр, які ў гэтым годзе сабраў не толькі майстроў пэндзля і алоўка, але і фотамастакоў.
Як паведамляецца на сайце парафіі Унебаўзяцця Найсвяценйшай Панны Марыі ў Мёрах Kascelmery.by, у нядзелю 25 жніўня ў старадаўнім кляштары пры касцёле дзейнічала выстава работ мастакоў, якая завяршылася падвядзеннем вынікаў працы.
Мастацкія пленэры пры друйскім касцёле па ініцыятыве былога пробашча парафіі ксяндза каноніка Сяргея Сурыновіча ладзяцца штогод, пачынаючы з 2015 года. Мэта пленэру — наладжванне дыялогу паміж рэлігіяй і мастацтвам. Цяперашні пробашч парафіі — ксёндз Вячаслаў Адамовіч — працягнуў гэтую важную ў культурным і рэлігійным плане справу.
На пленэр сёлета прыехалаі восем мастакоў з розных куткоў Беларусі. Штодня яны працавілі над сваімі карцінамі.
Кожны ствараў у сваёй тэхніцы і мастацкім жанры, але агульнай рысай для ўсіх мастакоў стала тое, што кожны з іх за час пленэру намаляваў друйскі касцёл. Вельмі цікава было пабачыць, як выглядае святыня вачыма розных мастакоў.
Напрыканцы тыдня да пленэру далучыліся фотамастакі, якія здымалі прыгожыя краявіды і «палявалі» за цікавымі момантамі з жыцця Друі. Вынікі іх працы можна будзе ўбачыць пазней, калі будуць апрацаваныя і надрукаваныя фотаздымкі.
У межах пленэру была арганізавана выстава работ заслужанага дзеяча мастацтваў Рэспублікі Беларусь Барыса Аракчэева «Палітры лета.
Мастацкі пленэр — гэта не толькі праца, але і культурны адпачынак.
Для ўдзельнікаў пленэру была зладжана экскурсія па Друі, а таксама ў Ідолту і Мілашова, дзе мастакі, між іншым, пазнаёміліся з гісторыяй каталіцкіх святынь.
У друйскім касцёле прайшла музычная вечарына Алеся Лася, які таксама ўдзельнічаў у пленэры і стварыў шэраг цікавых прац.
Пасля завяршэння пленэру мастакі выказалі словы ўдзячнасці ксяндзу Вячаславу Адамовічу за арганізацыю імпрэзы і за магчымасць культурнага і духоўнага ўзрастання.
