15 жніўня ў невялікай вёсачцы Дуды (Гродзенская дыяцэзія, Івейскі дэканат) адбыўся традыцыйны фэст з нагоды ўрачыстасці Унебаўзяцця Найсвяцейшай Панны Марыі.
У гэты дзень вернікі з усяго наваколля традыцыйна збіраюцца ў драўляны касцёл Нараджэння Маці Божай, дзе слыне ласкамі цудадзейны абраз Маці Божай Сакальскай.
Каб скласці перад іконай Нябеснай Маці свае просьбы і падзякі, тоолькі ў пешай пілігрымцы з Іўя на ўрачыстасць сёлета прыбылі 110 вернікаў.
На пачатку ўрачыстасці пробашч дудскай парафіі ксёндз Вячаслаў Матукевіч прывітаў усіх прысутных: парафіянаў, духоўных асоб, пілігрымаў, якія не толькі прыйшлі пешшу, але і прыехалі на роварах і машынах як з наваколля, так і з іншых мясцін.
Сваімі ўспамінамі пра фэст у Дудах падзяліўся з прысутнымі ксёндз канонік Андрэй Аніскевіч, дырэктар Дабрачыннага каталіцкага таварыства Caritas Беларусь.
Святар узгадаў сваё дзяцінства, звязанае з гэтым касцёлам, і выказаў радасць ад таго, што Івейская зямля мае сваю асаблівую святыню ў гонар Маці Божай.
У прамоўленай гаміліі ксёндз Андрэй на падставе свайго жыццёвага вопыту падкрэсліў важнасць Маці ў жыцці кожнага чалавала.
«Сёння мы ўзносім малітвы за нашых маці — галоўнага чалавека ў жыцці. Не забывайце пра іх! Не губляйце час, які мы можам прысвяціць нашым родным», — заахвоціў удзельнікаў фэсту святар.
Гістарычная даведка
Першы касцёл пад тытулам Нараджэння Найсвяцейшай Панны Марыі ў Дудах быў пабудаваны ў XVІ стагоддзі. З інвентара касцёла вядома аб тым, што ў галоўным алтары святыні знаходзіўся абраз Маці Божай Сакальскай, які быў аздоблены двума вотумамі. У 1732 годзе ксёндз Уладзіслаў Мацкевіч пабудаваў новы касцёл, у галоўным алтары якога таксама знаходзіўся абраз Маці Божай Сакальскай. У 1757 годзе пры ім знаходзілася ўжо 72 вотумы і яшчэ больш за 100 — каля іншых абразоў.
Цяперашні касцёл быў узведзены ў 1772 годзе коштам дудскіх старостаў Гераніма і Барбары з Сулістроўскіх Зянковічаў.
Пасвячаны ён быў пад тытулам Нараджэння Найсвяцейшай Панны Марыі і святога Язафата Кунцэвіча 28 верасня 1773 года. У святыні таксама ў галоўным алтары змяшчаўся старадаўні абраз Маці Божай Сакальскай.
Такім чынам, урачастасці ў Дудах маюць глыбокія карані, а абраз Маці Божай здаўна карыстаецца вялікай павагай сярод вернікаў.
