Апоўдні 16 жніўня біскуп Віцебскі Алег Буткевіч сустрэў удзельнікаў пешай пілігрымкі, якая кіруецца з Глыбокага ў Браслаў на сёлетні фэст Маці Божай Валадаркі азёраў, які адбываецца ў 25-ю гадавіну з часу заснавання Віцебскай дыяцэзіі.
Сустрэча адбылася каля касцёла Узвышэння Святога Крыжа ў Ахрэмаўцах, дзе пілігрымы спыніліся на абед.
Яны ў дарозе ўжо трэці дзень, за плячыма — больш за 70 пераадоленых кіламетраў, наперадзе — яшчэ каля дзесяці.
На шляху іх суправаджае малітва, спевы, сведчанні, а таксама нумары мастацкай самадзейнасці ў выглядзе чытання вершаў.
Пад кіраўніцтвам пробашча глыбоцкай парафіі Найсвяцейшай Тройцы ксяндза каноніка Мікалая Ціхановіча з Глыбокага ў Браслаў сёлета ідуць 90 пілігрымаў.
Наймалодшай удзельніцы Мар’яне ўсяго тры гадкі.
У дарозе мама вязе яе ў дзіцячым вазочку і кажа, што для дзяўчынкі гэта ўжо чацвёртая пілігрмка, бо першую яна «прайшла» ў жывоціку ў матулі.
Наогул пілігрымка вельмі «маладая», у ёй ідзе шмат моладзі і дзяцей школьнкага ўзросту.
Дзве дзяўчынкі з гонарам прызнаюцца, што ўсю дарогу ішлі пешкі і ані разу не пад’ехалі на машыне суправаджэння: гэта быў для іх своеасаблівы «квэст».
У пілігрымцы ідуць таксама некалькі семінарыстаў з міждыяцэзіяльнай семінарыі ў Гродне.
Біскуп Буткевіч сустрэў пілігрымаў пры ўваходзе ў касцёл, прывітаў іх і акрапіў асвячонаю вадою, пасля чаго ўсе разам памаліліся ў святыні.
Мясцовыя жыхары прыгатавалі для пілігрымаў смачны абед, на заканчэнне якога іерарх пачаставаў усіх марозівам.
Халодны дэсерт быў вельмі дарэчы ў спякотны поўдзень.
