У нядзелю 9 чэрвеня Мітрапаліт Мінска-Магілёўскі арцыбіскуп Юзаф Станеўскі наведаў Васілеўшчыну — вёску ў парафіі Унебаўзяцця Найсвяцейшай Панны Марыі ў Будславе (Мінска-Магілёўская архідыяцэзія, Мядзельскі дэканат).
Менавіта ў гэтай вёсцы быў створаны абраз, перад якім падчас сёлетняга Будслаўскага фэсту адбудзецца прысвячэнне Мінска-Магілёўскай архідыяцэзіі і ўсяго Касцёла на Беларусі Найсвяцейшаму Сэрцу Езуса.
Абраз з пашанаю неслі ад хаты да хаты нешматлікія вяскоўцы, якія засталіся ў Васілеўшчыне. Яны шчыра падзякавалі арцыбіскупу Станеўскаму, які неўзабаве пасля ўрачыстасці Сэрца Езуса, што адзначалася ў Касцёле 7 чэрвеня, наведаў іх і разам з імі памаліўся.
Арцыпастыр узначаліў цэлебрацыю свтой Імшы на палявым алтары на ўскрайку вёскі. У прамоўленай гаміліі ён засяродзіў увагу на Божай любові, якая ўцелавілася ў Езусе Хрысце і ўшаноўваецца ў кульце Найсвяцейшага Сэрца Езуса.
Арцыбіскуп Станеўскі заахвоціў вернікаў давяраць Хрысту ва ўсіх жыццёвцых сітуацыях і запэўніў, што Сэрца Езуса дапаможа ім супрацьстаяць усім спакусам і перамагчы кожнае зло, як гэта дасведчылі іх продкі падчас вайны.
Пробашч будслаўскай парафіі ксёндз Дзмітрый Дубовік распавёў гісторыю незвычайнага абраза. Як апавядаюць старэйшыя людзі, падчас Другой сусветнай вайны, у 1942 годзе, калі ўсіх мужчын забралі ў войска, а дзяўчат вывозілі на прымусовую працу ў Геманію, вяскоўцы з Васілеўшчыны, адной з вёсак у будслаўскай парафіі, звярнуліся з просьбаю аб малітве да тагачаснага будслаўскага пробашча, ксяндза Станіслава Жука. Святар параіў вернікам штодзённа маліцца перад абразом Найсвяцейшага Сэрца Езуса, даручаючы Яму лёсы ўсіх, хто ў віхуры вайны апынуўся далёка ад дома.
Жанчыны саткалі палатно, завезлі яго да мясцовага мастака па прозвішчы Бярнацкі, і той напісаў на ім абраз Сэрца Езуса. Каля прыдарожнага крыжа людзі зрабілі алтарык, дзе змясцілі выяву Збаўцы з палымнеючым Сэрцам на далоні, упрыгожылі кветкамі, прывезлі з Будслава ксяндза, і той асвяціў абраз. Пры гэтым святар наказаў насіць яго з хаты ў хату і на працягу тыдня збірацца ў гэтай хаце ўсёй вёскай на супольную малітву за родных і блізкіх, якія апынуліся ў небяспецы. Вяскоўцы так і зрабілі. Усе іх блізкія вярнуліся з вайны і з прымусовых прац, што стала цудоўным знакам плённасці малітвы да Найсвяцейшага Сэрца Езуса. Не раз малітва перад абразом ратавала вёску таксама ад страшных балотных пажараў.
Традыцыя насіць абраз па хатах падтрымлівалася ў Васілеўшчыне ажно 76 гадоў.
Аднак калі ў вёсцы засталося толькі некалькі жылых хат, каштоўную рэліквію вырашылі перадаць у каплічку ў суседняй вёсцы Вераб’і, пераробленую са звычайнай сялянскай хаты.
Ксёндз Дзмітрый паведаміў Catholic.by, што да яго патэлефанаваў Мітрапаліт Мінска-Магілёўскі арцыбіскуп Станеўскі, па чыёй ініцыятыве адбудзецца прысвячэнне Касцёла на Беларусі Сэрцу Езуса, і запытаўся, ці ў будслаўскай базыліцы ёсць адпаведны абраз, перад якім можна здзейсніць гэтае прысвячэнне.
Пробашч распавёў іерарху гісторыю абраза з Васілеўшчыны, і арцыпастыр вырашыў, што падчас фэсту Маці Божай Будслаўскай менавіта перад ім адбудзецца абрад прысвячэння Касцёла ў нашай краіне Найсвяцейшаму Сэрцу Езуса.
Абраз, які 76 гадоў насілі па хатах, быў адрэстаўраваны, і перад ім з удзелам арцыбіскпа Юзафа Станеўскага ўжо адбылося прысвячэнне дзяцей Беларусі Найсвяцейшаму Сэрцу Езуса.
