19 мая ад Хрысціянскага сацыяльнага цэнтра ў Мінску вырушыла пілігрымка дзвюх груп дзяцей, якія возьмуць удзел у Сусветных днях дзіцяці ў Рыме.
Сусветныя дні дзіцяці ўпершыню ў гісторыі пройдуць у Рыме 25–26 мая. Ініцыятарам іх правядзення стаў Папа Францішак, які такім чынам пажадаў стварыць «малодшы» варыянт Сусветных дзён моладзі. Для ўдзелу ў Днях дзіцяці было пададзена больш за 64 тыс. завявак з 85-і краін, у тым ліку з Беларусі.
Пачаткам пілігрымкі дзяцей з Мінска ў Рым стала святая Імша ў капліцы Хрысціянскага сацыяльнага цэнтра, цэлебрацыю якой узначаліў апоўдні арцыбіскуп эмэрыт Тадэвуш Кандрусевіч. На яе заканчэнне дзеці заспявалі гімн Сусветных дзён дзіцяці «Гэта мы».
Уначы дзве групы пілігрымаў разам з апекунамі выехалі аўтобусамі ў Вільню.
Нягледжзячы на позні час, на вакзал спецыяльна прыехаў Мітрапаліт Мінска-Магілёўскі арцыбіскуп Юзаф Станеўскі, які ўдзяліў дзецям сваё пастырскае благаслаўленне на добрую дарогу.
Групу дзяцей суправаджаюць бацькі і адказныя асобы на чале з сястрой Чаславай Навіцкай USJK, адказнай за душпастырства дзяцей у Мінска-Магілёўскай архідыяцэзіі. Маленькія беларускія вернікі возьмуць удзел у мерапрыемствах, якія ў межах Сусветных дзён дзіцяці будуць адбывацца на Алімпійскім стадыёне ў Рыме і на плошчы перад ватыканскай базылікай святога Пятра. На абедзвюх сустрэчах будзе прысутнічаць Папа Францішак.
Акрамя ўдзелу ў праграме Сусветных дзён дзіцяці, малыя пілігрымы з Беларусі наведаюць святыні і славутыя месцы Вечнага горада, сусветнага цэнтра хрысціянства.
