З 13 па 15 мая ў кляштары айцоў кармэлітаў босых пры санктуарыі Гродзенскай дыяцэзіі Маці Божай Шкаплернай у Гудагаі (Астравецкі дэканат) адбываліся рэкалекцыі для святароў.
Як паведамляецца ў суполцы Hudahaj у сацыяльнай сетцы Вк, у майскіх духоўных практыкаваннях бралі ўдзел святары з Астравецкага, Ашмянскага, Івейскага, Мастоўскага, Смаргонскага і Шчучынскага дэканатаў Гродзенскай дыяцэзіі, а таксама з Браслаўскага дэканата Віцебскай дыяцэзіі.
Рэкалекцыі правёў айцец Казімір Мараўскі OCD.
Духоўна ўмацаваныя яго глыбокімі аскетычнымі канферэнцыямі, супольнай і індывідуальнай малітвай перад цудадзейным абразом Маці Божай Гудагайскай і на самай вялікай Кальварыі ў Беларусі, святары вярнуліся ў свае парафіі, каб з адноўленай руплівасцю выконваць свае душпастырскія абавязкі.
У Гудагаі, дзе ўсё спрыяе малітоўнаму засяроджанню і духоўнаму ўзрастанню, рэгулярна праводзяцца рэкалекцыі для святароў, кансэкраваных асобаў, а таксама для моладзі і не толькі.
