У Хрысціянскім сацыяльным цэнтры ў Мінску сёлета ўжо ў другі раз адбыўся баль для студэнтаў, арганізаваны мінскай парафіяй святога Яна Евангеліста і святога Максімільяна Кольбэ, дзе нясуць служэнне ксяндзы хрыстусоўцы (дэканат Мінск-Захад).
Як было паведамлена 18 красавіка на сайце Місіі Добрага Самараніна Samaranin.by, паводле арганізатараў, баль — гэта прыклад таго, як прыгожа і высакародна можна праводзіць свой час. Такія мерапрыемствы дадуць добры плён у будучыні, таму што баль — гэта выхаванне добрых манер і паводзінаў, асабліва ў адносінах хлопцаў з дзяўчатамі.
Гэтым разам арганізатары паднялі планку даволі высока.
У праграме не было «простых» танцаў: удзельнікі танчылі вальсы і контрдансы. Хоць не кожны меў практыку такіх «па», усе выдатна адолелі цікавую праграму балю.
Апроч танцаў быў падрыхтаваны творчы нумар, зала была ўпрыгожана дэкарацыямі, а прысутныя атрымалі памятныя падарункі.
