29 і 30 сакавіка, у Вялікую пятніцу і Вялікую суботу, у касцёле святых апосталаў Пятра і Паўла ў Іўі (Гродзенская дыяцэзія) пры Найсвяцейшым Сакрамэнце ў сімвалічнай грабніцы Пана неслі варту міністранты, апранутыя як рымскія жаўнеры часоў Хрыста.
Паводле Евангелля, калі пасля смерці на крыжы цела Езуса было пакладзена ў магілу, рымскія ўлады вырашылі паставіць пры ёй варту, каб не даць паслядоўнікам Настаўніка з Назарэта забраць Яго. Евангелле апісвае, што вартаўнікі перажылі дзіўную падзею ўначы, калі ім з’явіўся анёл, і гэта пазбавіла іх прытомнасці ад страху.
Для хрысціянаў гэтая гісторыя сімвалізуе моц веры і перамогу над смерцю.
Калі зямля дрыжала, а ахоўнікі адчувалі страх і няўпэўненасць, Божая любоў здзейсніла план збаўлення. Ахоўнікі магілы Езуса сталі сведкамі цуду ўваскрасення, пра што потым і расказалі тым, хто іх паслаў.
Падобна да рымскіх жаўнераў, якія былі пасланыя сцерагчы грабніцу з целам Хрыста, міністранты івейскай парафіі святых апосталаў Пятра і Паўла ў Вялікую пятніцу і Вялікую суботу чувалі пры Найсвяцейшым Сакрамэнце.
Апранутыя ў «мундуры», што нагадваюць адзенне рымскіх жаўнераў часоў Хрыста, хлопцы, змяняючыся па чарзе кожныя 15 хвілін, трымаючы ў руках кап’ё і шчыт, неслі варту і сцераглі Езуса ў грабніцы.
Такая ганаровая варта пры сімвалічнай грабніцы Пана — гэта добрая традыцыя літургічнай службы алтара ў Іўі на працягу ўжо амаль двух дзесяцігоддзяў.
Незвычайная ініцыятыва патрабуе адпаведнай падрыхтоўкі: загадзя хлопцы рэпетуюць парадак выхаду на месца нясення варты, уладкоўваюць месца для адпачынку, а таксама рыхтуюць касцюмы. На варце важную ролю адыгрывае дысцыпліна: юнакі стаяць нерухома, не размаўляючы і трымаючы пры гэтым шчыты і коп’і.
Для задзейнічаных міністрантаў удзел у «старожках» — гэта магчымасць быць разам з Езусам і ў думках перанесціся на дзве тысячы гадоў таму, каб быць сведкамі і як быццам непасрэднымі ўдзельнікамі самай галоўнай падзеі ў гісторыі чалавецтва.
