29 сакавіка ў гродзенскай катэдральнай базыліцы святога Францішка Ксавэрыя адбылася літургія Вялікай пятніцы, якую ўзначаліў біскуп Аляксандр Кашкевіч.
Прэс-служба Гродзенскай дыяцэзіі нагадвае, што ў другі дзень Пасхальнага Трыдууму святая Імша не цэлебруецца ў знак вялікай павагі да крыжовай ахвяры Езуса Хрыста за грахі ўсяго свету. Гэта дзень глыбокага малітоўнага роздуму і посту, калі аддаецца пашана Крыжу, вернікі збіраюцца каля Хрыста і просяць Яго прабачыць ім і іх блізкім.
Літургіі Вялікай пятніцы ў гродзенскай катэдры папярэднічаў Крыжовы шлях, які правялі святары парафіі.
Літургія складаецца з трох частак: літургіі слова, адарацыі Крыжа і абраду Камуніі.
Спачатку біскуп, апрануты ў шаты чырвонага колеру, лёг ніцма перад алтаром. Гэта сімвалізуе пакору перад Хрыстом і смутак усяго Касцёла.
У літургіі слова першым чытаннем быў тэкст з Кнігі прарока Ісаі, дзе прарок кажа, што Месія будзе цярпець за людскія грахі. У Пасланні да Габрэяў адзначалася, што Хрысту вядомы чалавечы лёс, бо Ён жорстка выпрабоўваўся. Чытанне Евангелля нагадала, што праз Яго паслухмянасць здзейснілася збаўленне свету.
Генеральны вікарый Гродзенскай дыяцэзіі ксёндз канонік Аляксандр Мацкевіч у слове да вернікаў падкрэсліў, што «Божае прабачэнне атрымана не задарма — Езус аддаў жыццё».
«Хто думае, што прабачэнне дармовае, няхай паглядзіць на крыж і ўбачыць, якой цаной мы атрымалі збаўленне. Хрыстус адкупіў нас коштам сваёй крыві. Ён нас любіць і збаўляе», — адзначыў святар.
Цэнтральнай часткай набажэнства была адарацыя Крыжа. Крыж, закрыты фіялетавай тканінай, быў усталяваны перад алтаром. Біскуп, паступова адкрываючы яго, тройчы спяваў: «Вось дрэва Крыжа, на якім памёр Збаўца свету», на што вернікі адказвалі: «Пойдзем з паклонам». Прысутныя ўшанавалі Крыж, стаўшы на калені.
Трэцяя частка набажэнства распачалася супольнай малітвай «Ойча наш». У гэтай апошняй частцы літургіі знак супакою не перадаецца. Камунію вернікі атрымалі з кансэкраванага ў Вялікі чацвер Найсвяцейшага Сакрамэнту.
Пасля Камуніі біскуп перанёс Найсвяцейшы Сакрамэнт у грабніцу Пана, падрыхтаваную пры бакавой капліцы.
У гэтым месцы адбываецца выстаўленне Найсвяцейшага Сакрамэнту ў манстранцыі, накрытай празрыстым белым вэлюмам, як напамін пра плашчаніцу, у якую было захінута цела Езуса.
У канцы набажэнства распачалася Навэнна да Божай Міласэрнасці, якая будзе доўжыцца да першай нядзелі пасля Вялікадня. Кожны з прысутных мог памаліцца каля сімвалічнай грабніцы Пана.
