30 сакавіка арцыбіскуп эмэрыт Тадэвуш Кандрусевіч узначаліў цэлебрацыю абарадаў святой Пасхальнай Вігіліі ў гродзенскай парафіі Святога Духа на Альшанцы (дэканат Гродна-Захад).
Вялікая субота — дзень цішыні і чакання. У парафіі Святога Духа на працягу гэтага дня адбывалася благаслаўленне страваў на велікодны стол. Але вернікі не толькі прыносілі ў капліцу кошыкі з ежай, але і заставаліся на пэўны час, каб памаліцца ў цішыні перад Найсвяцейшым Сакрамантам у грабніцы Хрыста.
Увечары тут адбылася галоўная цэлебрацыя на працягу літургічнага года — святая Пасхальная Вігілія. У прамоўленай падчас яе гаміліі арцыбіскуп Тадэвуш Кандрусевіч падкрэсліў, што Пасхальная таямніца паказвае бязмежную любоў Бога да чалавека. «Езус не пакінуў чалавека аднаго, не пакінуў у палоне смерці. Бог вывеў усіх нас з палону граху сваёй смерцю на крыжы і ўваскрасеннем», — падкрэсліў заслужаны іерарх. Ён параўнаў смерць з касмічнай чорнай дзірой, якая паглынае ўсё і не аддае назад.
«Аднак Хрыстус перамог і выйшаў жывым з цёмнай магілы смерці», — сцвердзіў арцыпастыр, дадаўшы, што самае галоўнае свята хрысціянства — гэта ўваскрасенне Хрыста.
«Без уваскрасення не было б хрысціянства, не было б нашай веры. Пустым было б абвяшчэнне Евангелля», — заўважыў іерарх. Ён дадаў, што ўваскрослы Хрыстус жыве не толькі на старонках Бібліі, але таксама павінен жыць у нашых сэрцах. Паводле яго, гэта фундаментальнае пасланне Пасхі, якое павінна быць компасам зямнога жыцця чалавека, каб ён дасягнуў порту вечнага шчасця.
«Ідзіце ў Галілею, там убачыце Езуса, сказана ў Святым Пісанні. Галілея далёка ад нас, але ў кожным горадзе, у кожнай вёсцы, у кожным месцы ёсць свая Галілея. Яна ў кожным касцёле.
Тут, у капліцы, вы можаце пачуць Евангелле, сустрэцца з Езусам, паразмаўляць з Ім. Каб мы былі ў Езусе, а Езус жыў у нас», — выказаў арцыбіскуп Тадэвуш Кандрусевіч пажаданне на заканчэнне гаміліі.
