1 лютага 2024 г. ў будынку Мітрапалітальнай курыі ў Мінску прайшло пазачарговае, 89-е Пленарнае пасяджэнне Канферэнцыі Каталіцкіх Біскупаў у Беларусі.
У пасяджэнні ўзялі ўдзел Старшыня ККББ біскуп Віцебскі Алег Буткевіч, Мітрапаліт Мінска-Магілёўскі арцыбіскуп Юзаф Станеўскі, Віцэ-старшыня ККББ біскуп Гродзенскі Аляксандр Кашкевіч, Генеральны сакратар ККББ біскуп Юрый Касабуцкі, біскуп Пінскі Антоні Дзям’янка, біскуп Казімір Велікаселец, біскуп Аляксандр Яшэўскі SDB, арцыбіскуп Тадэвуш Кандрусевіч. На пасяджэнні таксама прысутнічалі Апостальскі нунцый у Беларусі арцыбіскуп Антэ Ёзіч, сакратар нунцыятуры кс. Кшыштаф Сэрока і Апостальскі адміністратар для католікаў візантыйскага абраду ў Беларусі архімандрыт Сяргей Гаек.
Біскуп Аляксандр Яшэўскі SDB прадставіў справаздачу аб удзеле ў Першай сесіі Асамблеі Сіноду Біскупаў на тэму сінадальнасці, якая адбылася увосень мінулага, 2023 года ў Рыме (Італія).
Было абмеркавана правядзенне Агульнабеларускай малітоўнай сустрэчы моладзі ў Браславе. Вызначана і зацведжана дата правядзення духоўнага мерапрыемства: 19–21 ліпеня 2024 г. Выбрана тэма малітоўнай сустрэчы: «Моладзь — радасць і надзея Касцёла ў Беларусі». Абмеркавана праграма мерапрыемства.
Было абмеркавана стварэнне ўнутрыкасцельнай асацыяцыі кананістаў (спецыялістаў па кананічным праве). Біскупы падтрымалі гэтую справу.
Адбылося абмеркаванне пазіцыі ККББ адносна выдадзенай Дактрынальнай дэкларацыі Дыкастэрыі веравучэння Fiducia supplicans, апублікаванай 18 снежня 2023 г. Распрацавана Паведамленне ККББ на тэму згаданай дэкларацыі.
Кс. Аляксей Ляшко распавёў пра падрыхтоўку да Юбілею 2025 г. у паўсюдным Касцёле.
На пасяджэння былі разгледжаны таксама іншыя бягучыя пытанні жыцця і дзейнасці Касцёла ў Беларусі.
Пасяджэнне завяршылася супольнай малітвай.
Мінск, 22 лістапада 2023 г.
✠Юрый Касабуцкі
Генеральны Сакратар ККББ
Кс. канонік Юрый Санько
Сакратар
