Гісторыя Касцёла ў Беларусі і найбольш знакамітых святыняў нашага Краю, выбітныя асобы мінуўшчыны, якія паўплывалі на развіццё Касцёла і сакральнага мастацтва, даследаванні і ўспаміны — усё гэта ажывае яркімі фарбамі на старонках чацвёртага нумара квартальніка «Наша вера» (№ 4, 2023).
Пазнаёміцца з новымі публікацыямі гісторыкаў, мастацтвазнаўцаў, літаратуразнаўцаў, паэтаў і пісьменнікаў у часопісе запрашаюць супрацоўнікі рэдакцыі на сайце ave-maria.by.
Гэты нумар часопіса пачынаецца публікацыяй даклада арцыбіскупа эмэрыта Тадэвуша Кандрусевіча «Мітрапаліт Станіслаў Богуш-Сестранцэвіч і заснаванне Магілёўскай мітраполіі», прачытанага ў Магілёве з нагоды юбілею Мітраполіі.
225-годдзю Мінскай дыяцэзіі прысвечаны рэферат ксяндза доктара Юрыя Дразда з Гомеля.
У рубрыцы «Постаці» друкуецца артыкул гісторыка Андрэя Шпунта «Айцец Адам Абрамовіч SІ — першы рэктар Collegium Nobilium у Вільні».
Супрацоўнікі Нацыянальнага мастацкага музея Беларусі Алена Карпенка і Іван Сінчук у артыкуле «Бэнэдыктынскі цудатворны абраз Дзевы Марыі Весабрунскай» прапануюць чытачам заканчэнне сваіх разважанняў пра адну з найкаштоўнейшых каталіцкіх святыняў.
У рубрыцы «Мастацтва» друкуецца артыкул рэстаўратара Ігара Сурмачэўскага «Род Альдабрандзіні — апекуноў мастацтва» (разважанне аб італьянскім паходжанні Будслаўскай Адзігітрыі).
Ганна Шаўчэнка ў артыкуле «Абраз Маці Божай Будслаўскай: новыя старонкі ў гісторыі і сучаснасці» распавядае пра кнігу «Апякунка Беларусі», выдадзеную ў мінскім выдавецтве «Pro Christo» у адыходзячым годзе.
У рубрыцы «Вяртаючыся да надрукаванага» змешчана даследаванне Алега Глекава «Гісторыя працягваецца…» пра сучасныя копіі і спісы абраза Маці Божай Будслаўскай.
Гісторык Таццяна Шумель прапануе ўвазе чытачоў артыкул «Вандруем па святынях. Касцёл у Радашковічах».
Мастацтвазнаўца Галіна Флікоп-Світа ў артыкуле «Іконы ў хаце беларусаў» цікава апавядае пра рэгіянальныя і канфесійныя асаблівасці ўладкавання абразоў у інтэр’еры сялянскага жытла.
У рубрыцы «Паэзія» змешчаны вершы паэтаў Дануты Бічэль і Георгія Ліхтаровіча.
225-годдзю з дня нараджэння Адама Міцкевіча прысвечана публікацыя літаратуразнаўцы Ірыны Багдановіч «О Марыя з Барунаў, ратуй…» і вершы паэта ў яе перакладзе.
У рубрыцы «Пераклады» друкуюцца вершы вядомай рускай паэткі, філолага, перакладчыцы Вольгі Седаковай у перастварэнні на беларускую мову Аксаны Данільчык.
У эсэ Крыстыны Лялько «Скрыганова поле» апавядаецца пра ўшанаванне памяці вядомага беларускага пісьменніка ягонымі нашчадкамі.
Магістр мастацтвазнаўства Ян Лысы ў артыкуле «Аповесць Васіля Быкава „Ліквідацыя“ і яе экранізацыя» распавядае пра сусветнавядомы твор беларускага пісьменніка і яго ўвасабленне ў кіно.
