26 лістапада, ва Урачыстасць Пана Нашага Езуса Хрыста, Валадара Сусвету, у Касцёле адзначаецца 38-ы Сусветны дзень моладзі на дыяцэзіяльным узроўні.
З гэтай нагоды два тыдні таму было абнародавана Пасланне Папы Францішка, тэмай якога сталі словы: «Цешцеся надзеяй» (Рым 12, 12).
«Сам Хрыстус з’яўляецца для нас цудоўным святлом надзеі і кіраўніцтва ў нашай ночы, таму што Ён — „ясная ранішняя зорка“ (Christus vivit, 33)», — падкрэсліў пастыр паўсюднага Касцёла.
Таксама са сваім зваротам да маладых людзей звярнуўся Мiтрапалiт Мінска-Магілёўскі арцыбіскуп Юзаф Станеўскі.
Арцыпастыр благаславіў моладзь на перажыванне дыяцэзіяльнага дня моладзі разам са сваімі братамі і сёстрамі ў моладзевых супольнасцях.
Для моладзі падрыхтаваны матэрыял для правядзення сустрэч у сваіх парафіях. Атрымаць яго можна пасля запаўнення формы па спасылцы ТУТ>>>
Кульмінацыяй дня моладзі ў архідыяцэзіі стане адвэнтавае моладзевае чуванне, якое адбудзецца ў ноч з 16 на 17 снежня ў архікатэдры Насвяцейшага Імя Марыі ў Мінску пад назвай «Ноч у Божым Валадарстве».
На ім моладзь разам будзе перажываць ноч у святле надзеі, у чаканні прыходзячага Збаўцы.
Распачнецца чуванне святой Імшой у 22.30, а завершыцца благаслаўленнем у 5.40 наступнага дня.
Як напісаў Пантыфік: «Уначы святло дапамагае нам бачыць рэчы па-новаму, і нават цемра набывае вымярэнне прыгажосці. Падобным чынам адбываецца са святлом надзеі, якім ёсць Хрыстус. Нашае жыццё становіцца асветленым Ім, Яго ўваскрасеннем. Разам з Ім мы бачым усё ў новым святле», — кажа Папа Францішак юнакам і дзяўчатам.
