З 17 па 19 лістапада ў касцёле Маці Божай Шкаплернай ў Мядзелі (Мінска-Магілёўская архідыяцэзія) адбыліся рэкалекцыі для мужчын і юнакоў.
Як паведамляе сайт руху «Мужчыны святога Юзафа» msj.by, духоўныя практыкаванні былі прысвечаны тэме «Які мой вобраз Бога Айца?»
У днях засяроджвання ўзялі ўдзел мужчыны і юнакі з Браслава, Ваўкавыска, Гродна, Ліды, Мінска, Мядзела і Смаргоні.
Праводзіў рэкалекцыі ксёндз Алег Хмылко, вікарый парафіі святога Андрэя Баболі ў Полацку.
Напачатку сустрэчы святар удакладніў, што на працягу трох дзён удзельнікі будуць шукаць сапраўдны вобраз Бога ў сваіх сэрцах.
«Мы можам шмат ведаць пра Пана, прачытаць не адну тэалагічную кнігу, але так і не спазнаць Нябеснага Айца як любячага, міласэрнага»,
— падкрэсліў ксёндз Алег.
«Важна таксама разумець, які мой жыццёвы досвед адносін з іншымі людзьмі: ці знаёмы я з прабачэннем, пяшчотай, любоўю? Таму што гэты досвед я праецырую на Бога. І калі досвед быў негатыўны, то і вобраз Айца будзе ілжывы: мне цяжэй спазнаць, які Пан насамрэч. Калі ў чалавека прэтэнзіі да Бога, то, хутчэй за ўсё, у яго прэтэнзіі да людзей», — адзначыў святар.
Адкуль бяруцца дрэнныя аналогіі (Бог-чалавек) у сэрцах, пачуццях, эмоцыях? Якія праблемы ў духоўнасці ўзнікаюць на падставе гэтых аналогій? Што з гэтым рабіць? Як выходзіць з ілжывых вобразаў Бога? На гэтыя і іншыя пытанні знайшлі ўдзельнікі рэкалекцый падчас духоўных практыкаванняў.
У праграму таксама ўвайшлі супольныя малітвы, штодзённы ўдзел у Літургіі, тры канферэнцыі, адпачынак, экскурсія, наведванне Мядзельскай кальварыі, сумесны прагляд фільма і разважанне над ім.
Напрыканцы рэкалекцый удзельнікі падвялі вынікі сустрэчы і атрымалі благаслаўленне.
