15 лістапада рэлігійная місія «Дабрачыннае каталіцкае таварыства Caritas» Мінска-Магілёўскай архідыяцэзіі (Caritas Мінск) правяла для супрацоўнікаў дзяржаўных устаноў трэнінг «Анлайн-навучанне, каб стаць практыкам MOVE».
Арганізатарамі мерапрыемства сталі Caritas Мінск пры падтрымке партнёраў — Caritas дыяцэзіі Лінц (Аўстрыя). Трэнінг адбыўся ў межах праекта «Рух у радасць».
MOVE (Mobility Opportunities Via Education) — гэта праграма рэабілітацыі, распрацаваная такім чынам, каб дапамагчы людзям з інваліднасцю набыць рухальныя навыкі, неабходныя для сядзення, стаяння, хады і пераходаў. Спецыялісты, якія працуюць у гэтай канцэпцыі, ацэньваюць патэнцыял функцыянальных магчымасцяў пацыента і з дапамогай розных практыкаванняў робяць людзей больш мабільнымі і незалежнымі ад дапаможных сродкаў і падтрымкі іншых людзей.
Удзельнікамі трэнінга сталі дэфектолагі, медсёстры, настаўнікі, выхаваўцы, сацыяльныя педагогі, псіхолагі, інструктар ЛФК — прастаўнікі каля 30-і дзяржаўных устаноў, якія займаюцца рэабілітацый і адукацыяй дзяцей з інваліднасцю.
Заняткі правялі замежныя эксперты: Элізабэт Рынгер-Нойман (MOVE-трэнер, псіхатэрапеўт) і Клаудзія Пэн (MOVE-кансультант, мотапедагог).
Інтэрактыўны семінар быў прысвечны найбольш важным для людзей навыкам — хадзе і сядзенню.
Беларускія спецыялісты пазнаёміліся з дэталёвай дыягностыкай функцыянальных магчымасцяў, метадамі і прыёмамі нейраразвіваючай тэрапіі. Асабліва карысным быў разбор прыкладаў рэальнай працы з інвалідамі ў Гомелі і Мінску.
Напрыканцы эксперты распавялі ўдзельнікам трэнінга, як укараняць праграму MOVE у сваёй установе.
Атрыманые веды дапамогуць беларускім спецыялістам зрабіць нашмат больш для людзей з інваліднасцю.
