З 1 па 3 красавіка ў Доме міласэрнасці ў гарадскім пасёлку Сапоцкін (Гродзенская дыяцэзія) прайшлі велікапосныя рэкалекцыі для супрацоўнікаў Caritas Беларусі. Трохдзённыя разважанні праводзіў ксёндз Андрэй Зайко.
Рэкалекцыі — гэта асаблівы час шукання Хрыста і спаткання з Ім, што патрабуе цішыні, засяроджання і малітвы. Кожнаму верніку патрэбны такі момант, у якім ён мае магчымасць сабрацца з думкамі, спарадкаваць свой свет, набыць навізну ў веры і малітве.
У заключны дзень духоўных практыкаванняў святую Імшу ў інтэнцыі ўсіх супрацоўнікаў і валанцёраў Caritas Беларусі цэлебраваў біскуп Гродзенскі Уладзімір Гуляй.
Падчас прамоўленай гаміліі іерарх адзначыў, што Вялікі пост — гэта благаслаўлёны час для кожнага, і заклікаў адкрыць свае сэрцы Божаму слову, каб Бог напоўніў іх сваёй прысутнасцю. Гэта дасць магчымасць супрацоўнікам і валанцёрам Caritas дарыць міласэрнасць іншым людзям.
