З 18 па 22 верасня ў рэкалекцыйным доме пры кляштары айцоў кармэлітаў босых у Мядзелі (Мінска-Магілёўская архідыяцэзія) праходзілі рэкалекцыі для духоўных асоб.
Святары маюць абавязак штогод удзельнічаць у духоўных практыкаваннях, каб няспынна паглыбляць сваю еднасць з Езусам Хрыстом — найвышэйшым і вечным Святаром Новага Запавету — і прыпадабняцца да Яго.
Мядзельскі Кармэль ужо ў другі раз прыняў духавенства на рэкалекцыі, якія праводзіў адзін з айцоў. У духоўных практыкаваннях бралі ўдзел пераважна святары з Мінска-Магілёўскай архідыяцэзіі разам з біскупам Юрыем Касабуцкім, а таксама некалькі іх сабратоў з суседніх з Мядзельскім дэканатам парафій Віцебскай дыяцэзіі.
Падчас рэкалекцый удзельнікі некалькі разоў на дзень збіраліся на супольную малітву, апоўдні разам цэлебравалі святую Імшу, увечары на працягу гадзіны ўдзельнічалі ў адарацыі Найсвяцейшага Сакрамэнту ў цішыні, а таксама слухалі глыбокія і змястоўныя духоўныя канферэнцыі, падставаю для якіх сталі разважанні святога Папы Яна Паўла ІІ з яго Апостальскага ліста Novo millennio ineunte, скіраванага біскупам, духавенству і ўсім вернікам.
Хоць гэтае пасланне Вялікага Папы было напісана на заканчэнне Юбілею 2000 года, яно не страціла сваёй актуальнасці, бо кіруе позіркі адрасатаў да пачатку і асновы хрысціянскай веры — асобы Езуса Хрыста. У трохдзённым падарожжы з мэтаю вяртання да святасці і ўмацавання ў пакліканні, рэкалекцыяніст не абмінуў увагаю і настаўленняў вялікіх святых Кармэлю: Тэрэзы ад Езуса, Яна ад Крыжа і Тэрэзы ад Дзіцяткі Езуса.
У перадапошні дзень духоўных практыкаванняў удзельнікі, як і летась, па ўласнай ініцыятыве правялі набажэнства Крыжовага шляху на старадаўняй Мядзельскай Кальварыі. На заканчэнне набажэнства, а трэцяй гадзіне, на Гары Крыжоў святары на чале з біскупам Касабуцкім памаліліся Вяночак да Божай Міласэрнасці.
На заканчэнне рэкалекцый духоўны айцец святароў Мінска-Магілёўскай архідыяцэзіі ксёндз канонік Аляксандр Барыла шчыра падзякаваў рэкалекцыяністу, а таксама адказнаму за рэкалекцыйны дом новапрызначанаму пробашчу мядзельскай парафіі айцу Аляксандру Стоку OCD за гасціннасць і клопат пра тое, каб удзельнікі духоўных практыкаванняў адчувалі сябе ўтульна і маглі атрымаць шчодры плён ласкі.
Айцец Аляксандр Стока, са свайго боку, запрасіў святароў на рэкалекцыі ў мядзельскі Кармэль таксама на наступны год, і гэтае запрашэнне было з энтузіязмам прынята большасцю прысутных.
Яшчэ адзін тур рэкалекцый для духавенства пройдзе на наступным тыдні ў Ляскоўцы, што пад Мінскам.
