Уначы 18 жніўня падчас урачыстасці Маці Божай Валадаркі азёраў з-за неспрыяльных умоў надвор’я была адменена традыцыйная працэсія са свечкамі.
Дзьмуў моцны вецер, з пакрытага хмарамі неба, якое штохвіліны пераразалі маланкі, падалі кроплі дажджу, і працэсію было вырашана не праводзіць.
Звычайна сотні чалавек ішлі за копіяй абраза Маці Божай Браслаўскай па начных вуліцах цёплай жнівеньскай ноччу. Яны неслі ў руках запаленыя паходні і свечкі, маліліся Радасныя таямніцы Ружанца, спяваючы паміж імі Марыйны спеў.
Традыцыйнай працэсіі вакол Замкавай гары не было толькі ў гады пандэміі каранавірусу.
Таксама і сёлета ружанцовая малітва адбылася ў касцёле перад цудадзейным абразом Маці Божай Валадаркі азёраў.
Расчараваных парафіянаў і пілігрымаў санктуарыя падтрымаў біскуп Юрый Касабуцкі. «Няма нічога дрэннага, чаго Бог не ператварыў на добрае», — апоўначы з гэтай думкі ён распачаў святую Імшу, цэлебрацыю якой узначаліў.
Гамілію падчас Эўхарыстыі прамовіў біскуп Віцебскі Алег Буткевіч. У скіраваным да вернікаў Божым слове іерарх засяродзіўся на цэнтральнай ролі Марыі ў Божым плане збаўлення чалавека.
