Рыма-каталіцкі біскуп эмэрыт, які стаў вядомым сваім пасярэдніцтвам паміж наркакартэлямі ў Мексіцы, быў выкрадзены, абвясціла ў панядзелак Мексіканская Рада Біскупаў.
Кіраўнікі Касцёла ў Мексіцы паведамілі што біскуп Сальвадор Ранхэль Мэндоса знік без вестак у суботу, і ў сваёй заяве яны заклікалі яго выкрадальнікаў вызваліць іерарха.
Мексіканскія біскупы сцвярджаюць, што іх зніклы сабрат меў праблемы са здароўем, і просяць яго выкрадальнікаў дазволіць яму прымаць лекі, называючы гэта «актам чалавечнасці».
Біскуп Ранхэль быў пастырам дыяцэзіі Чылпансінга-Чылапы ў паўднёвым штаце Герэра, дзе наркакартэлі гадамі змагаюцца за ўплыў. У намаганнях, якія пазней падтрымаў урад, біскуп Сальвадор Ранхэль спрабаваў пераканаць лідэраў банд спыніць кровапраліцце і дасягнуць пагаднення.
