![](/3/images/news/2024/02/2024-02-08-vlvlviln25-10.jpg)
Увечары 6 лютага здарыўся пажар у касцёле Сэрца Езуса ў Вільні, які ў апошні час зачынены і не дзейнічае.
Як паведаміла Каталіцкае інфармацыйнае агенцытва КАІ, у будынку касцёла былога кляштара візітак, размешчанага на вуліцы Роса (Расу) гарэла драўляная падлога. Віленская паліцыя падазрае, што пажар узнік у выніку падпалу.
Пажарныя прыбылі на тушэнне каля 17.00. З вокнаў касцёла ішоў дым. Паводле папярэдніх ацэнак, страты ад пажару складаюць каля пяці тыс. еўра.
Касцёл Сэрца Езуса пры кляштары Ордэна сясцёр Адведзінаў Найсвяцейшай Панны Марыі (візітак) быў пабудаваны ў 1756 годзе ў стылі позняга барока.
Пасля задушэння Паўстання 1863–1864 гадоў святыня была ператворана ў праваслаўную царкву святой Марыі Магдалены. У 1919 годзе сёстры візіткі вярнуліся ў Вільню, кляштар і касцёл былі адрамантаваныя. Пасля Другой сусветнай вайны савецкія ўлады зачынілі святыню, а кляштар ператварылі ў вязніцу. Пасля атрымання Літвой незалежнасці да 2007 года тэрыторыя кляштару працягвала выкарыстоўвацца як пенітэнцыярная ўстанова.
У 2018 годзе літоўскія ўлады перадалі Каталіцкаму Касцёлу ўсе будынкі касцёльна-кляштарнага комплексу. У цяперашні час святыня зачынена і не дзейнічае.
Непасрэдна за мурамі касцёла Сэрца Езуса размешчаны хоспіс імя благаслаўлёнага ксяндза Міхала Сапоцькі, заснаваны сястрой Міхаэлай Рак з супольнасці сясцёр Езуса Міласэрнага.