Адпаведны дэкрэт Апостальскай Пэнітэнцыярыі, падпісаны яе кіраўніком кардыналам Маўро П’ячэнцай, быў выдадзены 1 сакавіка і абвешчаны вернікам у Беларусі 29 красавіка ў Браславе падчас урачыстага святкавання 100-годдзя з часу заснавання Кангрэгацыі сясцёр служабніц Езуса ў Эўхарыстыі.
У дакуменце пад нумарам Prot. N. 00463/2023-54/23/I гаворыцца, што для паглыблення пабожнасці вернікаў і збаўлення душаў, моцаю паўнамоцтваў, нададзеных Святым Айцом Папам Францішкам, узяўшы пад увагу просьбы, скіраваныя маці Малгажатай Ваўрык, Генеральнай настаяцельніцай сясцёр служабніц Езуса ў Эўхарыстыі, галоўная сядзіба якой знаходзіцца ў Прушкаве Варшаўскай архідыяцэзіі, з нагоды стагоддзя гэтай законніцкай супольнасці з нябеснай скарбніцы Касцёла ласкава дазваляе, каб пры звычайных умовах (сакрамэнт споведзі, эўхарыстычная Камунія і малітва ў інтэнцыях Святога Айца ) сёстры, асобы, звзаныя з іх супольнасцю і ўсе вернікі, якія шчыра каюцца і кіруюцца любоўю, атрымлівалі з 19 сакавіка 2023 года да 19 сакавіка 2024 года поўны адпуст, які могуць ахвяраваць як дапамогу душам, што пакутуюць у чысцы, калі любую святыню згаданай Кангрэгацыі, дзе б яна ні знаходзілася, наведаюць у пілігрымцы і будуць там пабожна ўдзельнічаць у юбілейных святкаваннях або прынамсі прысвецяць адпаведны час пабожнаму разважанню, якое завершаць малітвай Ойча наш, вызнаннем веры і малітоўнымі заклікамі да Маці Божай.
Сёння ў Беларусі сёстры эўхарысткі нясуць служэнне ў наступных парафіях: святога Космы і Дам’яна, а таксама Адшукання святога Крыжа ў Астраўцы (Гродзенская дыяцэзія), святога Яна Паўла ІІ у Гродне (Гродзенская дыяцэзія), Нараджэння Найсвяцейшай Панны Марыі ў Барысаве (Мінска-Магілёўская архідыяцэзія), Нараджэння Маці Божай у Браславе (Віцебская дыяцэзія), святога Андрэя Баболі ў Полацку (Віцебская дыяцэзія) і Божага Провіду ў Слабодцы (Віцебская дыяцэзія), а таксама духоўна звязаныя з парафіяй Найсвяцейшай Тройцы ў Друі (Віцебская дыяцэзія) — месцам, дзе з’явілася першая супольнасць сясцёр, дзе знаходзіцца іх першы дом і дзе эўхарысткі да нядаўняга часу таксама неслі служэнне.
Старэйшыя асобы, хворыя і ўсе, хто з сур’ёзнай прычыны не могуць пакідаць дом, таксама маюць магчымасць атрымаць поўны адпуст, калі, адкінуўшы ўсялякі грэх і пастанавіўшы выканаць усе ўмовы, духоўна далучацца да юбілейных святкаванняў, ахвяруючы Міласэрнаму Богу свае малітвы і цярпенні, а таксама жыццёвыя выпрабаванні, якія зносяць.
Апостальская Пэнітэнцыярыя таксама звяртаецца з просьбай да святароў рупліва служыць сакрамэнтам пакаяння, каб вернікам было зручней атрымаць ласку прабачэння моцаю ўлады ключоў Касцёла.
На заканчэнне адзначаецца, што дэкрэт дзейнічае толькі на згаданую акалічнасць.
