3 снежня адзначаецца Міжнародны дзень людзей з інваліднасцю, а напрыканцы лістапада ў Браславе (Віцебская дыяцэзія) адбылася адмысловая сустрэча для людзей з абмежаванымі магчымасцямі.
Як паведамляецца на сайце санктуарыя Маці Божай Браслаўскай, Валадаркі азёраў Waladarka.by, кляштар сясцёр Эўхарыстак у Браславе гасцінна адчыніў свае дзверы для інвалідаў аддзялення сацыяльнай рэабілітацыі, абілітацыі.
Сустрэча распачалася святой Імшой у капліцы кляштара. Эўхарыстыя цэлебравалася ў інтэнцыі ўсіх людзей з асаблівасцямі Браслаўскага раёна, а таксама супрацоўнікаў тэрытарыяльнага цэнтра сацыяльнага абслугоўвання насельніцтва.
Традыцыйна апоўдні ў Каталіцкім Касцёле прамаўляецца малітва «Анёл Панскі», і ўдзельнікі сустрэчы таксама ахвяравалі малітву за блізкіх памерлых.
Потым адбылася канферэнцыя з абмеркаваннем прагледжанага кароткаметражнага фільма «Цырк батэрфляй». Прысутныя шчыра дзяліліся ўражаннямі, падкрэсліўшы галоўную думку: трэба бачыць прыгожае, верыць у сябе і ніколі не здавацца.
Усе былі згодныя з тым, што абмежаваныя магчымасці — гэта толькі штуршок у будучыню, а якой яна будзе — залежыць ад кожнага асабіста.
Пасля канферэнцыі адбылася ўсім вядомая гульня «Поле цудаў», у якой кожны ўдзельнік змог раскрыць розныя якасці характару, а сяброўская атмасфера дапамагла аб’яднацца. На заканчэнне сустрэчы гасцей чакаў смачны абед.
Удзельнікі сустрэчы выказалі шчырую падзяку робашчу браслаўскай парафіі ксяндзу Станіславу Мжыглуду SDS і сёстрам эўхарысткам, якія нясуць служэнне пры санктуарыі, за прысвечаны час, сумесную малітву і клопат.
