У нядзелю 11 верасня на Мядзельскай Кальварыі — адной з самых старадаўніх у Беларусі — адбыліся традыцыйныя ўрачыстасці ў гонар Узвышэння Святога Крыжа.
Як паведамляецца на сайце Вікарыяту Кармэлітаў Босых у Беларусі karmel.by, пробашч парафіі айцец Генрых Валэйка OCD разам з сабранымі ў мядзельскім касцёле Маці Божай Шкаплернай святарамі і вернікамі прывітаў у святыні Мітрапаліта Мінска-Магілёўскага арцыбіскупа Юзафа Станеўскага. Першапачаткова планавалася прайсці ад святыні працэсіяй на Мядзельскую Кальварыю, якая знаходзіцца за горадам, але з-за неспрыяльнага надвор’я запланаваную праграму давялося змяніць.
Замест працэсіі ў святыні адбылася малітва на ружанцы, якая суправаджалася разважаннем арцыпастыра.
Потым тыя, хто не спалохаўся холаду, ветру і дажджу, у індывідуальным парадку скіраваліся на Кальварыю, дзе адбылося набажэнства Крыжовага шляху, у якім узяў удзел арцыбіскуп Станеўскі.
Разважанні Крыжовага шляху правёў айцец Андрэй Авен OCD. Складанасці, звязаныя з кепскім надвор’ем, не перашкодзілі малітоўнай засяроджанасці і нават стварылі адпаведную атмасферу ў разважанні над мукай Пана. Пасля заканчэння набажэнства на гары Трох Крыжоў адбылася ўрачыстая святая Імша, цэлебрацыю якой узначаліў арцыбіскуп Станеўскі.
Падчас Імшы пяцёра мясцовых парафіянаў прынялі з рук іерарха сакрамэнт канфірмацыі, які таксама называюць сакрамэнтам хрысціянскай сталасці.
Урачыстае пастырскае благаслаўленне, якое ўдзяліў сабраным арцыбіскуп Юзаф Станеўскі, і яго чулыя словы, скіраваныя да ўсіх прысутных, а асабліва да новаканфірмаваных, завяршылі ўрачыстасць, якая, нягледзячы на халоднае надвор’е, запаліла сэрцы гарачым апостальскім духам.
