З 3 па 4 верасня праходзіла 5-я пешая пілігрымка Магілёў – Бялынічы.
Яе ўдзельнікамі сталі вернікі Магілёва і Бабруйска, дзеці, моладзь, а таксама старэйшыя асобы.
Пілігрымка распачалася раніцай 3 верасня святой Імшой у катэдры Унебаўзяцця Найсвяцейшай Панны Марыі і святога Станіслава ў Магілёве.
Пасля Эўхарыстыі, атрымаўшы благаслаўленне, пілігрымы ў суправаджэнні святароў і сясцёр законных вырушылі насустрач Маці Божай Бялыніцкай са сваімі інтэнцыямі і думкамі, з надзеяй і верай.
Першы дзень пілігрымкі прайшоў у суправаджэнні айца Рамана Шульца ОР. Падчас пілігрымкі адбылася канферэнцыя, якую пад адкрытым небам правёў айцец Раман. Святар звярнуў увагу на тэму супакою, якая сустракаецца ў тэкстах Святога Пісання.
Пасля канферэнцыі пілігрымы вырушылі да месца вячэры і начлегу. У вёсцы Вялікі Нежкаў іх сустрэла сям’я Кротавых, якая ўжо пяты год прымае ў сваім доме пілігрымаў. Кожны з тых, хто ішоў да Маці Божай пешшу, змог адпачыць і скарыстацца з гасціннасці гаспадароў.
Вось што распавядаюць Віктар і Рэгіна Кротавы:
«Прымаць у доме пілігрыма — гэта значыць прымаць Хрыста. Мы з адкрытым сэрцам ужо пяты год адчыняем дзверы нашага дома. Канешне, мы вельмі хваляваліся, каб усім хапіла месца для добрага адпачынку, каб далей пілігрымы з радасцю працягнулі шлях да Маці Божай Бялыніцкай. Спадзяёмся, што ў нас атрымалася. Чакаем усіх у наступным годзе!»
Пасля начлегу пілігрымка, якую на другі дзень суправаджаў біскуп Аляксандр Яшэўскі SDB, вырушыла далей.
У дарозе да Бялынічаў пілігрымы маліліся на Ружанцы, спявалі песні, а таксама мелі магчымасць паспавядацца і паразмаўляць з біскупам на духоўныя тэмы.
Ідучы да Маці Божай Бялыніцкай, пілігрымы падбадзёрвалі сябе словамі «крычалкі»: «Мы разам, нас многа, ідзём да Маці Бога». І сапраўды, пілігрымаў для ўсходняй часткі Мінска-Магілёўскай архідыяцэзіі сабралося нямала: 60 асоб ішлі пешкі ў Бялынічы, а да іх духоўна далучыліся іншыя, якія дасылалі свае інтэнцыі і сачылі за пілігрымкай анлайн.
Вось з якімі інтэнцыямі і думкамі пілігрымы ішлі да Маці Божай Бялыніцкай:
Аляксандра, Магілёў, першая пілігрымка:
«Я пачала рухацца ў патрэбным кірунку духоўнага жыцця. Гэта новы ўзровень вызнавання веры, перамога над собой, адданне сябе».
Мар’ям, Магілёў, 5-я пілігрымка:
«Пілігрымка — магчымасць данесці просьбы да Маці, зразумець тое, што ёсць у жыцці. Гэта магчымасць сустрэць новых людзей, распавесці сваё сведчанне бліжняму. Час, калі супольнасць аб’ядноўваецца».
Максім, Бабруйск, 4-я пілігрымка:
«Я іду, трымаючы пост на хлебе і вадзе, у інтэнціі родных, сяброў і знаёмых, а таксама супольнасці францішканаў на Беларусі і ўсіх католікаў. Яшчэ прашу Бога аб новай добрай працы».
Эльвіра Чаславаўна, Магілёў, першая пілігрымка:
«Я іду з інтэнцыяй аб навяртанні моладзі Беларусі, аб пашырэнні парафіі, узносячы малітвы за моладзь, за сына, за хросных дзяцей, за ўсіх памерлых. Гэта мая першая пілігрымка ў жыціі, і яна цяжкая. Калі ў мяне пытаюцца, ці цяжка ісці, я адказваю, што Езусу на крыжы было значна цяжэй. Чым бліжэй падыходжу да іконы Божай Маці, тым лягчэй. Мае цярпенні — гэта ахвяра».
Пілігрымы ўвайшлі ў Бялынічы ў добрым настроі, гучна і з песнямі. Прайшоўшы праз увесь горад, дайшлі да касцёла, у якім узялі ўдзел у адпустовай урачыстасці, скарысталіся з сакрамэнту споведзі, магчымасці памаліцца і адпачыць каля копіі іконы Маці Божай Бялыніцкай.
Мясцовыя парафіяне разам з пробашчам бялыніцкай парафіі ксяндзом Юзафам Сярпейкам цудоўна падрыхтавалі касцёл і навакольную тэрыторыю да сустрэчы пілігрымаў. Яны арганізавалі кірмаш, а таксама пачаставалі кавай і смачнай вячэрай.
