3 жніўня пасля ранішняй святой Імшы ў касцёле Найсвяцейшай Тройцы ў Друі (Браслаўскі раён), у дарогу да Росіцы (Верхнядзвінскі раён) вырушлі 90 пілігрымаў.
За тры дні яны пешкі пераадолеюць каля васьмідзесяці кіламетраў і возьмуць удзел ва ўрачыстасцях у гонар благаслаўлёных святароў марыянаў Антонія і Юрыя, мучанікаў Другой сусветнай вайны.
Як паведамляецца на сайце мінскай грэка-каталіцкай парафіі святога праведнага Язэпа Svjazep.org, у Друі знаходзіўся кляштар беларускіх марыянаў, з якога ў Росіцу на нялёгкую місію ваеннага часу прыехалі святары Антоні Ляшчэвіч і Юрый Кашыра.
Там 17 і 18 лютага 1943 года разам са шматлікімі жыхарамі наваколля яны загінулі мучаніцкай смерцю ад рук нацысцкіх карнікаў.
Асаблівае благаслаўленне для пілігрымаў, якія ідуць з Друі ў Росіцу, даслаў з Рыма Генеральны настаяцель марыянаў ксёндз Анджэй Пакула МІС.
У лісце, адрасаваным адказнаму за пілігрымку ксяндзу Іллі Саўчанку МІС, Генеральны настаяцель, між іншым, піша: «Традыцыйная пілігрымка з Друі ў Росіцу ў гэтым годзе з’яўляецца часткай святкавання Юбілею 350-годдзя Ордэна марыянаў.
Няхай праз малітвы благаслаўлёных мучанікаў Антонія і Юрыя гэтая пілігрымка стане для ўсіх удзельнікаў часам плённага асэнсавання спадчыны Друі і Росіцы і духоўнага подзвігу на шляху веры, надзеі і любові.
Табе, ойча Ілля, марыянам, якія служаць пілігрымам, і ўсім пілігрымам шлю з Рыму благаслаўленне і запэўніваю аб духоўнай еднасці ў малітве», — напісаў ксёндз Анджэй Пакула МІС.
