Пошук

02.08.2022 11:29   Тэкст: Ганна Навіцкая / Фота: Віктар Ведзень / Catholic.by

30 ліпеня ў парафіі святога Казіміра ва Уселюбе (Гродзенская дыяцэзія, Навагрудскі дэканат) адбыўся другі фестываль-рэкалекцыі Novafest, лейтматывам якога сталі словы з Евангелля паводле Лукі: «Вы ж сведкі гэтага» (Лк 24, 48).

Ужо другі год Навагрудчына сустракала гасцей розных узростаў з усёй краіны, якія прыбылі на ўселюбскі фестываль-рэкалекцыі. Сярод зарэгістраваных былі ўдзельнікі з Асіповічаў, Астраўца, Бярозаўкі, Гродна, Іўя, Ліды, Мінска, Навагрудка, Смаргоні, Узды, Уселюба, Фаніпаля, Шчучына і іншых гарадоў і вёсак нашай краіны. Былі на фестывалі і госці з блізкага замежжа — з Санкт-Пецярбурга.

Усіх сабраных, незалежна ад узросту, аб’ядноўвала прага малітвы, пазнання Бога, жаданне праслаўляць Яго.

Фестываль распачаўся ўрачыстай святой Імшой, цэлебрацыю якой узначаліў ксёндз Яўген Шымановіч.

Праграма фестывалю ўключала ў сябе таксама канферэнцыі, Вяночак да Божай Міласэрнасці, сведчанні людзей, Крыжовы шлях, Ружанец, адарацыю, благаслаўленне.

На сёлетнім фестывалі-рэкалекцыях удзельнікі мелі магчымасць пазнаёміцца з дзейнасцю касцёльных рухаў.

Так, прадстаўнікі беларускага рэгіёну міжнароднага руху сужэнскай духоўнасці Equipes Notre-Dame прапаноўвалі ўдзельнікам і гасцям фестывалю выканаць заданне «Прысядзем разам»: на флаеры, які атрымліваў кожны жадаючы, быў салодкі падарунак і пытанне, на якое адказваў кожны з сужонкаў. Прадстаўнікі «Апостальства салетынскай сям’і» раздавалі кнігі з пасланнем Панны Марыі ў Ля-Салет, а ўдзельніцы руху «Маці ў малітве» і намеснік дырэктара дабрачыннага фонду «Адкрытыя сэрцы» Іван Пузанаў расказвалі пра сваю дзейнасць, дэманструючы тэматычныя флаеры і буклеты. Ужо традыцыйна ўдзельнікі руху «Легіён Марыі» правялі Ружанец.

Шчыра і кранальна гучалі са сцэны сведчанні людзей. Розныя жыццёвыя сітуацыі, розныя людзі, розныя лёсы…

Кожны, хто слухаў гэтыя сведчанні, станавіўся сведкам жыццёвых гісторый, часта цяжкіх і, здавалася б, безнадзейных, але ў кожнай гэтай гісторыі людзі адкрываліся на Бога, кардынальна змянялі сваё жыццё, бо сустрэліся з Хрыстом, паверылі Яму, даверыліся Яго Маці.

Атмасферу, якая заахвочвае да малітвы, да разваг, стваралі на фестывалі музычны гурт «Міхаэлькі» з Мінска (кіраўнік Анастасія Усніч) разам з Вольгай Хілько, гродзенскі гурт «OPEN» Душпастырства студэнтаў і старэйшай моладзі, гурт з Міра.

Спецыяльна для сёлетняга фестывалю ў парафіяльным музеі-краме былі створаны тэматычныя экспазіцыі, прысвечаныя гісторыі ўселюбскага касцёла і мястэчка Уселюб.

На сёлетнім фестывалі адбылося адкрыццё «Казіміраўскай пошты».

Што такое «Казіміраўская пошта»? Гэта адна з форм сведчання пра нашу веру, пра касцёл ва Уселюбе, пра Божую і чалавечую любоў.

Працуе гэта так. З парафіі святога Казіміра ва Уселюбе ў любую мясціну Беларусі і ў любую краіну замежжа можна будзе выслаць паштоўку з выявай уселюбскага касцёла, уселюбскіх крыжоў, фігуры Маці Божай, сцэн з мінулагодняга фестывалю (аўтар фота Віктар Ведзень) і са слупком верша «Уселюб» паэткі і валанцёра фестывалю Алены Казловіч-Усцілоўскай.

Арганізатары прапануюць пісаць на паштоўцы словы малітоўнай падтрымкі родным, блізкім, сябрам, святарам, проста знаёмым.

Паштоўка з Уселюба — гэта, з аднаго боку, знак нашай увагі, нашай любові і клопату, якімі мы можам парадаваць бліжняга. Гэта ўсмешка, абдымкі, якія мы перадаем праз адлегласць.

З другога боку, гэта нагода адкрыць для сябе і дапамагчы ў гэтым іншым нашу Беларусь, адкрыць Уселюб. Як зазначаюць аўтары ініцыятывы, звычайная паштоўка можа стаць добрым прыкладам малодшаму пакаленню, якое такім чынам будзе вучыцца адорваць людзей увагай і малітвай.

Трэба дадаць, што высылка паштовак з Уселюба можа стаць цікавым квэстам. У вершы чатыры слупкі, а на кожнай паштоўцы размешчаны толькі адзін. На адваротным баку паштоўкі можна знайсці нумар слупка. Калі разаслаць родным і сябрам паштоўкі з усімі чатырма слупкамі, то пасля таго, як яны іх атрымаюць, змогуць стэлефанавацца і сабраць са слупкоў верш. На думку аўтараў ідэі, гэта выдатная нагода пачуць адзін аднаго і адчуць увагу бліжняга.

Першыя паштоўкі з малітоўнымі прывітаннямі і словамі падтрымкі ўжо паляцелі з фестывалю Novafest да сваіх адрасатаў у розныя гарады і вёскі Беларусі і замежжа.

…Благаслаўленне напрыканцы фестывалю-рэкалекцый — адзін са шчымліва-цёплых момантаў, калі, здаецца, спыняецца час у ахутаным змрокам Уселюбе, які ззяе агеньчыкамі свечак у руках удзельнікаў.

І кладуцца на сэрца словы пробашча ўселюбскай парафіі ксяндза Віталія Цыбульскага: «Можаце растварацца ў свеце з гэтым святлом. Вяртацца з ім дадому і не гаснуць».

 

Абноўлена 02.08.2022 12:31
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа