Раніцай 29 чэрвеня, ва ўрачыстасць святых апосталаў Пятра і Паўла, з Мінска ў Нацыянальны санктуарый Маці Божай Будслаўскай на фэст стартала група пілігрымаў на роварах.
Перад дарогаю ўдзельнікі велапілігрымкі сабраліся на святой Імшы ў касцёле святога Сымона і святой Алены ў Мінску (Чырвоны касцёл).
На заканчэнне ўрачыстай цэлебрацыі святар благаславіў пілігрымаў на дарогу, акрапіўшы іх асвячонаю вадою.
Пасля Імшы група ў складзе двух дзясяткаў пілігрымаў на жалезных конях скіравалася ў бок Радашковічаў. У мястэчка, дзе быў ахрышчаны Купала, яны прыбудуць пад вечар і застануцца там на начлег. У другі дзень з пагоркаў паўночнай Міншчыны велапілігрымы спусцяцца ў даліну Віліі і наступную ноч правядуць у Касцяневічах, што непадалёк ад Вілейкі.
Пілігрымка завершыцца 1 ліпеня, калі ўдзельнікі дасягнуць мэты свайго падарожжа і далучацца да святкавання сёлетніх урачыстасцў у гонар Маці Божай Будслаўскай у Нацыянальным санктуарыі Беларусі.
