16 мая ў парафіі Унебаўзяцця Найсвяцейшай Панны Марыі і святога Андрэя Баболі ў Казловічах (дэканат Гродна-Усход) з удзелам біскупа Гродзенскага Аляксандра Кашкевіча ўрачыста адзначылі 100-гадовы юбілей аднаўлення і пасвячэння касцёла.
Як паведамляе Grodnensis.by, у гэты дзень у парафіяльнай супольнасці адзначалася адпустовая ўрачыстасць з нагоды літургічнага ўспаміну нябеснага апекуна святога Андрэя Баболі, святара і мучаніка, апостала Палесся.
Яго рэліквіі з пашанаю ўнёс у касцёл біскуп Кашкевіч, і цяпер вернікі парафіі змогуць заўсёды маліцца перад імі праз заступніцтва святога Андрэя Баболі.
Рэліквіі былі перададзены ў дар казловіцкай парафіі яе былым пробашчам ксяндзом канонікам Андрэем Садоўскім, які цяпер служыць у Беластоцкай архідыяцэзіі ў Польшчы.
Прысутных на ўрачыстасці святароў на чале з дэканам дэканату Гродна-Усход ксяндзом канонікам Паўлам Шанчуком, сясцёр законных, парафіянаў і гасцей прывітаў пробашч ксёндз Яўген Барысюк.
Біскуп Аляксандр Кашкевіч узначаліў цэлебрацыю святой Імшы, падчас якой маліўся ў інтэнцыі ўсёй парафіяльнай супольнасці, за ўсіх, хто прычыніўся да пабудовы і аднаўлення святыні ў Казловічах, і за ўсіх святароў, якія служылі ў гэтай парафіі.
Гамілію прамовіў пробашч парафіі Беззаганнага Зачацця Найсвяцейшай Панны Марыі ў Квасоўцы (дэканат Гродна-Захад) ксёндз Тадэвуш Крыштопік, які сам паходзіць з парафіі ў Казловічах. Святар засяродзіўся на асобе і духоўнай спадчыне святога Андрэя Баболі, які з апостальскай руплівасцю абвяшчаў Евангелле на Палессі.
Біскуп Кашкевіч падзякаваў пробашчу парафіі за клопат аб святыні і даручаных яму верніках, а парафіянам — за трыванне ў веры і прывязанасць да свайго касцёла. Шмат мясцовых парафіянаў сёння жыве ўжо ў Гродне, але цёплыя пачуцці злучаюць іх з роднай парафіяй, таму яны рэгулярна наведваюць не толькі могілкі, дзе пахаваны іх блізкія, але таксама нярэдка ўдзельнічаюць у Імшы ў пабудаваным іх продкамі касцёле.
Іерарх падкрэсліў важнасць перадачы веры наступным пакаленням, каб адчуванне сябе супольнасцю Божых дзяцей не знікла, а вера клапатліва перадавалася дзецям і моладзі.
Урачыстасць завяршылася эўхарыстычнай працэсіяй вакол старадаўняга касцёла з багатай і складанай гісторыяй. Каталіцкая святыня ў часы царызму пэўны час была праваслаўнай царквой, а ў змрочны савецкі перыяд змагання з верай была ператворана ў збожжасховішча і паступова разбуралася. Адраджэнне касцёла пачалося ў 1989 годзе дзякуючы намаганням мясцовых вернікаў. 16 мая 1990 года, у парафіяльную ўрачыстасць святога Андрэя Баболі, тут зноў адбылася святая Імша.
