16 мая ў Хрысціянскім сацыяльным цэнтры ў Мінску адбылася сустрэча з зоркамі беларускай оперы, якія прадставілі праграму «Ростані».
Як паведамляецца на сайце Хрысціянскага сацыяльнага цэнтра дабрачыннай місіі Добрага Самараніна Samaranin.by, праграма «Ростані» ўключала беларускую вакальную музыку розных эпох і розных кірункаў.
Барока, класіка, народныя песні выканалі таленавітыя салісты беларускай оперы — Таццяна Гаўрылава і Юрый Гарадзецкі. Партыя фартэпіяна — Паліна Задрэйка.
На сустрэчы з зоркамі оперы прысутнічаў арцыбіскуп эмерыт Тадэвуш Кандрусевіч.
«Ростані — месца расстання? Напэўна, так, бо дарогі там разыходзяцца, расстаюцца. Але людзі, якія ходзяць па гэтых дарогах, на ростанях сустракаюцца і знаёмяцца. Ці надоўга? Пра гэта ніхто не ведае, але так склалася, што месца развітання заўсёды становіцца месцам сустрэчы.
Вось і на нашай творчай вечарыне адбыліся сустрэчы: сустрэчы галасоў, сустрэчы эпох, сустрэчы музычных стыляў і кірункаў, а самае галоўнае — сустрэча слухача з выключнымі, радаснымі і шчымлівымі, вядомымі і забытымі, народнымі і прафесійнымі творамі вакальнага мастацтва», — адзначаецца на сайце Цэнтра.
У межах праграмы гучалі канты са славутага зборніка «Полацкі сшытак», арыі з оперы «Фауст», беларускія народныя песні, спевы на словы Адама Міцкевіча, Максіма Багдановіча, Янкі Купалы, Уладзіміра Караткевіча, Алеся Гаруна, Адама Русака, Ніла Гілевіча, Яўгеніі Янішчыц і іншыя творы.
Больш фота з праграмы «Ростані» ТУТ>>>
