![](/3/images/news/2022/04/2022-04-12-vokl4-2022a.jpg)
Перад Вялікаднем выйшаў з друку красавіцкі нумар часопіса «Ave Maria» (№ 4 (325) 2022), які прысвечаны важнасці супакою ў свеце і ў чалавечых душах.
Як адначаецца ў анонсе, змешчаным на сайце часопіса ave-maria.by, гэта адно з тых вечных пытанняў, якія заўсёды турбуюць чалавецтва, і адна з найбольшых каштоўнасцяў, без якой усе іншыя хутка становяцца марнасцю.
Асаблівае месца ў гэтым нумары займаюць публікацыі надзвычай важных і актуальных у гэтыя дні дакументаў: «Чыну прысвячэння Беззаганнаму Сэрцу Марыі», урыўка з канстытуцыі Gaudium et spes Другога Ватыканскага Сабору «Захаванне спакою і развіццё міжнароднай супольнасці» і паслання Папы Пія ХІІ на Вялікдзень 1941 года «Не аслабляйце сваёй малітоўнай пільнасці».
На вокладцы часопіса змешчаны некалькі малітваў аб супакоі і літанію да Маці Божай, Каралевы супакою.
Тэме супакою прысвечаны таксама матэрыял айца Юрыя Кулая OCD з рубрыкі «Школа малітвы», а ў рубрыцы «Святар адказвае на пытанне» разам з ксяндзом Андрэем Рылкам прапануем паразважаць пра вайну і ваяўнічасць праз прызму Святога Пісання.
Ксёндз канонік Ігар Лашук распавядае аб сваёй пілігрымцы па Палессі з фігураю святога Арханёла Міхала і копіяй абраза Маці Божай Юравіцкай у інтэнцыі міру ва Украіне.
Чытачам прапануецца шукаць спакой і ўнутраную раўнавагу з дапамогаю ўрыўкаў з Бібліі і выказванняў святых і славутых людзей, прысвечаных супакою і міру, якія выбрала і падрыхтавала Іна Бігель. Практычныя парады аб тым, як пераадолець стрэс, дае ў сваім артыкуле Юлія Шэдзько.
Ганна Шаўчэнка заклікае паразважаць над падзеямі нашага жыцця, трывогамі, няўпэўненасцю і клопатамі ў святле евангельскіх урыўкаў аб уваскрасенні Хрыста. Сведчанне аб досведзе прабачэння ў цяжкіх жыццёвых абставінах падрыхтавала Галіна Калевіч.
Віктар Ведзень працягвае дзяліцца з чытачамі часопіса «Ave Maria» ўспамінамі аб аўтамабільнай пілігрымцы па Беларусі з найбольш шанаванымі абразамі Маці Божай з беларускіх санктуарыяў.
Старонкі часопіса ўпрыгожваюць вершы Дануты Бічэль і Антаніны Святохі.
Рэдакцыя шчыра дзякуе чытачам за дасланыя лісты. У гэтым нумары часопіса з рэдакцыйнай пошты друкуюцца ўспаміны Антаніны Святохі аб касцёле святога Юзафа ў Маладзечне і яго парафіянах, а таксама публікуецца ліст Марыі Качаноўскай з Негарэлага, у якім яна задаецца важным пытаннем: як ставіць Бога на першае месца ў сваім жыцці.