![](/3/images/news/2022/02/2022-02-28-Vokladka-AM-Lico-news.jpg)
Сакавіцкі нумар часопіса «Ave Maria» (№ 3 (324) 2022) прысвечаны ролі жанчын у Касцёле.
Агляд новага нумара з’явіўся на сайце выдання ave-maria.by.
Рэдакцыя часопіса запрашае чытачоў разам з аўтарамі паразважаць над роляю жанчын у Бібліі і правесці пэўныя паралелі з сучаснасцю.
Як у сваім прывітальным слове заўважыла рэдактар часопіса «Ave Maria» Крыстына Лялько, жанчыны Касцёла «сваім служэннем і сваім жыццём заўсёды ўплывалі (і ўплываюць) на фармаванне вобразу Касцёла, яго аблічча, робячы гэтае аблічча больш узнёслым і кранальным, святым і прывабным, бо заўсёды яны мелі (і маюць) за прыклад найперш Марыю — Маці Хрыста і Маці Касцёла».
У рубрыцы «Школа малітвы» айцец Юрый Кулай OCD прапануе паразважаць пра вядомы евангельскі сюжэт: сустрэчу Хрыста з грэшніцамі і тое, як Ён не асуджае людзей, а дапамагае ім адмовіцца ад граху. У рубрыцы «Святар адказвае на пытанне» ксёндз Андрэй Рылка тлумачыць, чаму жанчыны не могуць прымаць сакрамэнт пасвячэння.
Ганна Шаўчэнка ў сваім артыкуле закранае важнае для кожнай жанчыны пытанне — адчуванне ўласнай прыгажосці.
Вялікае інтэрв’ю з Людмілай Платавай, чэшкай, якая ўжо шэсць гадоў працуе ў рэлігійнай місіі «Дабрачыннае каталіцкае таварыства Caritas», падрыхтавала Іна Бігель.
Айцец Яўген Голуб OFMConv дзеліцца з чытачамі думкамі аб сутнасці жаночай прыроды і «новым фемінізме».
Віктар Ведзень падрыхтаваў для чытачоў грунтоўны матэрыял, прысвечаны аўтамабільнай пілігрымцы па Беларусі з копіямі найбольш шанаваных абразаоў Маці Божай з беларускіх марыйных санктуарыяў.
Старонкі часопіса ўпрыгожваюць вершы і пераклады нашай пастаяннай аўтаркі Ірыны Багдановіч і паэзія Марыі Новікавай, інтэрв’ю з якой таксама публікуецца ў гэтым нумары «Ave Maria».
Рэдакцыя часопіса шчыра дзякуе чытачам за дасланыя лісты. У гэтым нумары часопіса друкуюцца словы віншавання, з якімі вернікі Віцебскай дыяцэзіі звяртаюцца да біскупа Алега Буткевіча з нагоды яго 50-годдзя. Рэдакцыя часопіса «Ave Maria» далучаецца да гэтых віншаванняў.