Напярэдадні ўрачыстасці Нараджэння Пана Старшыня Канферэнцыі Каталіцкіх Біскупаў у Беларусі біскуп Віцебскі Алег Буткевіч узяў удзел у тэлеперадачы «Вечерний Витебск», якая выйшла ў прамым эфіры тэлерадыёкампанiі «Вiцебск» 24 снежня.
Як паведамляецца на партале Catholicnews.by, у святочнай праграме разам з іерархам бралі ўдзел вiкарый віцебскай парафii Святой Барбары айцец Вiталь Сапега ОР, а таксама парафіяльная моладзь, якая заспявала песні праслаўлення.
У перадачы былі закранутыя розныя тэмы: ад святкавання Калядаў да сутнасці веры, ад адносін чалавека з Богам да аховы стварэння.
На заканчэнне перадачы, якая працягвалася амаль гадзіну, біскуп Буткевіч павіншаваў усіх вернікаў са святам Божага Нараджэння.
«Дарагія браты і сёстры ў Хрысце, няхай гэтае свята Божага Нараджэння, да якога мы рыхтаваліся, якое сустракаем з такой вялікай радасцю, напоўніць супакоем вашыя сэрцы; няхай прыняся спаўненне тых найглыбейшых жаданняў.
Варта даверыцца Богу — таму Слову, якое сталася целам і ёсць сярод нас. Няхай гэтая радасць будзе спадарожнічаць вам, вашым сем’ям, усёй нашай краіне на працягу надыходзячага Новага года», — пажадаў кіраўнік беларускага каталіцкага епіскапату
