Айцы дамінікане, якія нясуць душпастырскае служэнне ў парафіі святога Казіміра і святой Ядвігі ў Магілёве, запрашаюць усіх ахвотных падчас Адвэнту з 1 па 22 снежня штодзённа разам чытаць, разважаць і ўцелаўляць у жыццё кнігу Апакаліпсісу.
Штодзённа айцы прапануюць чытаць па адным раздзеле апошняй кнігі Новага Запавету, якая складаецца з 22-х раздзелаў. Гэтаму чытанню яны запрашаюць прысвяціць каля 30-і хвілін кожны дзень.
Парадак чытання і разважання:
- Перад чытаннем прасіць Духа Святога, каб асвятліў сваёю мудрасцю.
- Прачытаць раздзел уважліва 1–2 разы
- Сканцэнтравацца на словах, якія асабліва кранулі
- Паразважаць над гэтымі словамі
- Распачаць асабістую размову з Богам
- Падзякаваць за дары і праславіць Найвышэйшага
- Зрабіць добры учынак, які падказвае Слова Божае
Усіх ахвотных распачаць супольнае чытанне кнігі Апакаліпсісу айцы дамінікане запрашаюць далучыцца да групы ў Viber: АпАдвэнт2021 (кантакт: +375 (29) 291 92 11 — айцец Раман Шульц ОР).
У групе будзе з’яўляцца штодзённы каментар да адпаведнага раздзела, а таксама разважанне польскага дамініканіна айца Адама Шустака ОР, узятае з яго «Страшных рэкалекцый» у перакладзе на беларускую мову.
«Няхай нашая адвэнтавая сустрэча са Словам Божым будзе часам навяртання і супольнай малітвы, каб Божы Сын, Эмануэль, нарадзіўся нанава ў нашых сэрцах», — выказваюць пажаданне арганізатары ініцыятывы.
