20 ліпеня на 104-м годзе жыцця адышла ў вечнасць Альжбета з Радзівілаў Тамашэўская — апошняя асоба славутага княскага роду, якая жыла ў нясвіжскім палацы Радзівілаў.
Пра гэта паведаміў на сваёй старонцы ў сацыяльнай сетцы Facebook прадстаўнік роду Мацей Радзівіл.
«Пайшла з жыцця незвычайная асоба. Сведка некалькіх эпох. Апошняя асоба, для якой замак Радзівілаў у Нясвіжы быў проста домам. Няхай адпачывае ў супакоі», — напісаў Мацей Радзівіл.
Пробашч парафіі Божага Цела ў Нясвіжы ксёндз Пётр Шарко паведаміў Catholic.by, што сама спачылая выказвала пры жыцці волю, каб яе парэшткі былі пахаваныя ў фамільнай крыпце Радзівілаў у нясвіжскім касцёле Божага Цела, якая існуе ўжо 400 гадоў, і дзе пахаваны яе бацька.
«Я сёння размаўляў па тэлефоне з пляменнікам памерлай Альжбеты Мацеем Радзівілам, і ён сказаў, што сёння ўвечары збярэцца сямейная рада для абмеркавання часу і месца пахавання спачылай. Гэта перадусім сямейная справа прадстаўнікоў роду: у Альжбеты, акрамя іншых родзічаў, застаўся сын», — дадаў святар, які не выключае магчымасці пахавання дачкі апошняга ўладальніка Нясвіжа ў крыпце касцёла.
- Святая Імша за спачылую Альжбету з Радзівілаў Тамашэўскую адбудзецца ў касцёле Божага Цела ў Нясвіжы ў аўторак, 27 ліпеня, а 18-й гадзіне.
Альжбета Радзівіл нарадзілася 17 лістапада 1917 года ў сям’і апошняга ўладальніка Нясвіжа князя Альбрэхта Радзівіла і англічанкі Дораці Паркер Дыкан. Пасля разводу бацькоў яна жыла з маці ў Лондане, але час ад часу прыязджала ў Нясвіж, у апошні раз — у 1935 годзе.
У 1993 годзе яна зноў наведала Беларусь, а ў 2009 разам з іншымі прадстаўнікамі роду радзівілаў здзейсніла неафіцыйны візіт у краіну.
Як зазначае Тelegraf.by, сама Альжбета Радзівіл казала, што, калі б яе сям’ю не выгналі з Беларусі ў 1939 годзе бальшавікі, яна цяпер бы размаўляла на беларускай мове, як рабіў гэта яе тата з жыхарамі Нясвіжа.
Нашчадка славутага роду дала некалькі каштоўных парад падчас рэстаўрацыі Нясвіжскага замку пасля пажару на пачатку 2000-х.
Радзівілы — магнацкі род Вялікага Княства Літоўскага, прадстаўнікі якога ў XV–XVIII стагоддзях займалі вышэйшыя пасады ў дзяржаве і Касцёле. Ужо да сярэдзіны XVI стагоддзя Радзівілам у Беларусі належалі Давыд-Гарадок, Клецк, Койданава, Копысь, Мір, Нясвіж, Чарнаўчыцы, Шчучын і мноства іншых населеных пунктаў.
