1 красавіка ксёндз канонік Францішак Рудзь узяў удзел у заключнай сустрэчы праграмы «Дыялог культур і рэлігій», якая праводзілася па ініцыятыве Беларускага дзяржаўнага ўніверсітэта з мэтай захавання і папулярызацыі духоўных каштоўнасцяў дзеля кансалідацыі грамадства.
Сустрэча прайшла ў праваслаўным храме ў гонар іконы Божай Мацi «Усіх тужлівых радасць» у Мінску і стала завяршальнай у цыкле мерапрыемстваў, якія ўключалі наведванне храмаў і дыялог з прадстаўнікамі асноўных рэлігій і канфесій краіны.
Падобная сустрэча з прадстаўнікамі каталіцкай канфесіі прайшла 18 сакавіка ў мінскай парафіі Маці Божай Будслаўскай. Са студэнтамі і выкладчыкамі БДУ тады сустрэўся біскуп Казімір Велькаселец і пробашч парафіі ксёндз канонік Францішак Рудзь.
У заключным мерапрыемстве праекта «Дыялог культур і рэлігій» ўзялі ўдзел прадстаўнікі каталіцкага, юдэйскага і ісламскага веравызнанняў.
Для гасцей правялі экскурсіі ў храме і Цэнтры асветы і міласэрнасці Беларускага Экзархата.
У межах праграмы прайшло пасяджэнне круглага стала і абмеркаванне пытанняў выкладання рэлігіязнаўства ў духоўных і свецкіх установах адукацыі, рэстаўрацыі і рэканструкцыі архітэктурных збудаванняў, захавання і экспанавання прадметаў рэлігійнага культу, перспектывы развіцця пілігрымкавага турызму.
