10 сакавіка ў мінскім касцёле Маці Божай Будслаўскай (Чырвоны бор, Захад) адбылася сустрэча Апостальскага адміністратара sede vacante Мінска-Магілёўскай архідыяцэзіі біскупа Казіміра Велікасельца са студэнтамі і выкладчыкамі Беларускага дзяржаўнага універсітэта.
Студэнты і выкладчыкі наведалі святыню ў межах праграмы «Дыялог культур і рэлігій», прысвечанай «Году народнага адзінства» ў Рэспубліцы Беларусь.
Мэта праграмы — вывучэнне культурных і рэлігійных традыцый прадстаўнікоў розных канфесій, падтрыманне іх шматвекавых талерантных адносін.
Падчас сустрэчы біскуп Казімір Велікаселец распавёў аб ролі рэлігіі ў сферы навукі і адукацыі. У размове са студэнтамі і выкладчыкамі іерарх адказаў на пытанні адносна набажэнстваў у Каталіцкім Касцёле, аб перспектывах будаўніцтва сакральных будынкаў у Мінску, а таксама падзяліўся рэцэптам прыгатавання студэнцкай стравы і адкрыў сакрэт свайго хобі.
Ксёндз канонік Францішак Рудзь, пробашч парафіі Маці Божай Будслаўскай, распавёў пра гісторыю ўзнікнення санктуарыя ў Будславе, абраз Маці Божай Будслаўскай і Будслаўскі фэст, які ў 2018 годзе быў уключаны ў Спіс нематэрыяльнай культурнай спадчыны ЮНЕСКА.
Праграма «Дыялог культур і рэлігій» уключае сустрэчы з прадстаўнікамі розных канфесій у Рэспубліцы Беларусь.
Так, 2 сакавіка ксёндз канонік Францішак Рудзь разам з прадстаўнікамі БДУ пабываў на экскурсіі ў Саборнай мячэці ў Мінску, якую правёў старшыня Савета імамаў Рэспубліканскага рэлігійнага аб'яднання Дзмітрый Радкевіч.
18 сакавіка плануецца наведванне мінскай сінагогі Бэйс Ісраэль і сустрэча з галоўным равінам Рэлігійнага аб'яднання супольнасцяў прагрэсіўнага іудаізму Рыгорам Абрамовічам.
На 25 сакавіка запланавана наведванне праваслаўнага храма ў гонар іконы Божай Маці «Усіх засмучаных Радасць», а таксама Цэнтра духоўнай асветы і сацыяльнага служэння. Экскурсію павядзе магістр педагагічных навук протадыякан гэтай праваслаўнай парафіі айцец Яраслаў Блізнюк. У межах сустрэчы пройдзе дыскусія ў фармаце круглага стала з удзелам прадстаўнікоў Каталіцкага Касцёла ў Беларусі.
