4 лютага ў Мінску збіраюцца прадстаўнікі традыцыйных канфесій Беларусі з нагоды Міжнароднага дня чалавечага братэрства, які па ініцыятыве Папы Францішка святкуецца ў гэты дзень упершыню.
Каталіцкі Касцёл на сутрэчы прадстаўляе Ганаровы Мітрапаліт Мінска-Магілёўскі арцыбіскуп Тадэвуш Кандрусевіч.
На міжканфесійным форуме ў Мінску будуць абмяркоўвацца тэмы, актуальныя для Беларусі.
Сярод іх — тэма дыялогу і выпрацоўкі адзінай пазіцыі канфесій перад выклікамі і пагрозамі сучаснасці (аборты, наркаманія, алкагалізм); каардынацыя намаганняў па пераадоленні сацыяльна-палітычнага напружання і вырашэнні сацыяльных праблем; вызначэнне шляхоў супрацоўніцтва прадстаўнікоў розных канфесій у Беларусі; выпрацоўка адзінай пазіцыі адносна пахавання памерлых у адпаведнасці з традыцыяй, якая паходзіць ад Абрагама (супраць крэмацыі).
На форуме таксама разгледзяць прапанову аб правядзенні міжканфесійнага моладзевага круглага стала ў Мінскай саборнай мячэці. Сустрэча плануецца ў сакавіку.
Падставай для сустрэчы стаў «Дакумент пра чалавечае братэрства дзеля міру ва ўсім свеце», падпісаны Папам Францішкам 4 лютага 2019 г. у Абу-Дабі разам з Вялікім імамам універсітэта Аль-Азхар у Каіры шэйхам Ахмедам Эль Таебам.
