10 сакавіка ў Мінску прайшоў міжрэлігійны семінар «Культура і рэлігія. Дыялог у XXI стагоддзі», у якім у якасці прадстаўніка Каталіцкага Касцёла па даручэнні Мітрапаліта Мінска-Магілёўскага арцыбіскупа Юзафа Станеўскага ўзяў удзел ксёндз канонік Францішак Рудзь.
Семінар праводзіўся па ініцыятыве Мінскага міжнароднага адукацыйнага цэнтра імя Ёганэса Раў, адным з заданняў якога з’яўляецца спрыянне міжкультурнаму і міжканфесійнаму дыялогу.
У межах семінара прадстаўнікі розных канфесій і рэлігій абмеркавалі праблемы фармавання, станаўлення і развіцця культуры міжканфесійнага і міжрэлігійнага дыялогу ў Беларусі.
З боку прадстаўніка Касцёла асаблівая ўвага была нададзена тэалагічна-філасофскай спадчыне святога Яна Паўла ІІ, які заклікаў да дыялогу і добрасуседства паміж сусветнымі рэлігіямі.
Удзельнікі семінара яшчэ раз сцвердзілі, што тэма дыялогу культур і рэлігій не губляе сваёй актуальнасці. У сваім выступленні ксёндз Францішак Рудзь адзначыў, што сёння Рыма-Каталіцкі Касцёл выступае актыўным партнёрам і гарантам міжканфесійнага супрацоўніцтва. Выразны заклік да такога дыялогу прагучаў ужо ў энцыкліцы Папы Яна XXIII Pacem in terris. Гэты дакумент, абнародаваны ў 1963 годзе, быў адрасаваны вернікам розных веравызнанняў. У ім Папа падкрэсліў неабходнасць узаемадзеяння ўсіх дзяржаў дзеля абароны міру і іншых агульначалавечых каштоўнасцяў.
Яго наступнік Папа Павел VI у энцыкліцы Ecclesiam suam, якая з’явілася ў 1964 годзе, у якасці агульных каштоўнасцяў у гэтым дыялогу назваў мір, справядлівасць, свабоду, прагрэс, культуру.
Другі Ватыканскі сабор пацвердзіў канцэпцыю дыялогу са светам. У Рымскай Курыі — цэнтральным кіраўнічым апараце Касцёла — за міжрэлігійны дыялог ужо больш за паўстагоддзя адказвае створаная Паўлам VI у 1964 годзе Папская рада па міжрэлігійным дыялогу, якая выдае свой часопіс «Pro Dialogo».
Вялікі ўнёсак у гэтую справу следам за сваімі папярэднікамі зрабіў Папа Ян Павел II. Ён выступаў за збліжэнне Каталіцкага Касцёла з іншымі хрысціянскімі супольнасцямі і нехрысціянскімі канфесіямі.
Гэта стала яшчэ адным важным крокам для развіцця дыялогу паміж усімі сусветнымі рэлігіямі.
Папа Францішак таксама звяртае вялікую ўвагу на братэрства як асноўнае вымярэнне дыялогу і адносін паміж прадстаўнікамі розных рэлігій. У энцыкліцы Fratelli tutti, прысвечанай братэрству і сацыяльнаму сяброўству, ён звярнуў увагу на неабходнасць фармавання і падтрымання братэрскіх і сяброўскіх адносін.
У Беларусі, шматканфесійнай краіне, міжрэлігійны дыялог вядзецца па ініцыятыве прадстаўнікоў розных рэлігійных канфесій пры падтрымцы дзяржавы і няўрадавых арганізацый, такіх, як цэнтр Ёганэса Раў. Варта адзначыць, што большасць удзельнікаў семінара ужо на працягу года з’яўляюцца таксама актыўнымі ўдзельнікамі праекта Беларускага дзяржаўнага ўніверсітэта «Дыялог культур і рэлігій».
«Падобныя праекты і ўдзел у іх Касцёла ў Беларусі сведчаць аб паспяховым развіцці міжкультурнага і міжканфесійнага дыялогу ў нашай краіне», — лічыць ксёндз Францішак Рудзь.
