Рымскі сакратарыят Першавярхоўнага Арцыбіскупа Украінскай Грэка-Каталіцкай Царквы Святаслава Шаўчука даслаў падзяку за словы братэрскай салідарнасці, выказаныя Канферэнцыяй Каталіцкіх Біскупаў у Беларусі ў Звароце адносна вайны ва Украіне.
У лісце, адрасаваным каталіцкім біскупам Беларусі, ад імя арцыбіскупа Шаўчука выказваецца шчырая падзяка за «братэрскую салідарнасць і духоўную падтрымку ў гэтыя драматычныя дні».
«Мы просім вас далучыцца да нас у малітве, каб Бог міру даў нам моц спыніць агрэсію і абараніць народ Украіны», — гаворыцца ў лісце, падпісаным прадстаўніком рымскага бюро Сакратарыяту кіраўніка УГКЦ айцом Андрэем Салецкім.
Ён таксама запэўнівае беларускі каталіцкі епіскапат у тым, што, як толькі Першавярхоўны Арцыбіскуп зможа вярнуцца да выканання свайго служэння ў мірным жыцці, ён абавязкова знойдзе магчымасць падзякаваць асабіста.
