Напярэдадні ўрачыстасці Нараджэння Хрыстова, якое вернікі Беларускай Праваслаўнай Царквы адзначаюць 7 студзеня, Апостальскі нунцый Антэ Ёзіч скіраваў віншаванне на імя Мітрапаліта Мінскага і Заслаўскага Веніяміна.
Прадстаўнік Папы Францішка ў нашай краіне ў асобе Патрыяршага Экзарха ўсяе Беларусі сардэчна віншуе ўсіх праваслаўных братоў і сясцёр з Нараджэннем Хрыстовым і Новым, 2021 годам.
У прыватнасці, Нунцый Ёзіч піша:
«У гэтыя святочныя дні нашыя пачуцці і думкі скіроўваюцца да Бэтлеемскіх ясляў, у якіх свету з’явіўся Збаўца, Дзіцятка Езус. Хоць мы святкуем гэтую збаўчую падзею ў розны час, аднак нас аб’ядноўваюць агульная радасць у Пану і спадзяванне на Яго», — падкрэсліў прадстаўнік Святога Пасаду.
Ён пажадаў Мітрапаліту Веніяміну, а ў яго асобе — усім вернікам Беларускай Праваслаўнай Царквы перадусім міру, абвешчанага пры Нараджэнні Хрыста анёламі.
«Праз заступніцтва Найчысцейшай Багародзіцы і святога Юзафа, якому ў Рыма-Каталіцкім Касцёле Яго Святасць Папа Францішак прысвяціў бягучы год, няхай сыйдуць на Вас і на Вашу паству шчодрыя дары Божай ласкі, здароўе, згода, радасць і дабрабыт», — напісаў Апостальскі нунцый Антэ Ёзіч.
На заканчэнне прадстаўнік Папы Францішка ў нашай краіне пажадаў, каб не аслабла нашая вера і каб ва ўсім быў праслаўлены Пан, Нараджэнне якога з’явіла збаўленне і радасць усяму свету.
Разам з Апостальскім нунцыем Антэ Ёзічам віншаванне праваслаўным братам з Нараджэннем Хрыстовым падпісаў таксама сакратар Апостальскай нунцыятуры ў Беларусі ксёндз Махэр Шаммас.
