![](/3/images/news/2020/12/2020-12-29-konkurs_batleek_20_31.jpg)
У парафіі Нараджэння Найсвяцейшай Панны Марыі пры санктуарыі Маці Божай Валадаркі Азёраў у Браславе прайшоў конкурс на лепшую самаробную стайню-батлейку з яслямі.
Як зазначаецца на парафіяльным сайце Waladarka.by, з-за каранавірусу былі перакрэслены некаторыя планы: не было тэатралізаванай батлейкі, не было шматлікіх аплаткавых сустрэч, Бэтлеемскай зоркі… Таму вырашылі зрабіць конкурс, які дазваляе не збіраць адначасова вялікую колькасць людзей. Батлейкі рабілі сем’ямі: бацькі з дзецьмі.
На пачатку Адвэнту душпастыры запрасілі сем’і парафіі ўзяць удзел у гэтым конкурсе. Свае працы можн было прыносіць да апошніх Раратаў.
Усяго ў конкурсе ўзялі ўдзел 18 сем’яў. Кожная праца была па-свойму прыгожай і арыгінальнай, таму вельмі складана было выбраць лепшую.
У гэтым арганізатарам дапамаглі самі парафіяне: адбылося галасаванне. На працягу тыдня кожны мог аддаць свой голас за тую батлейку, якая найбольш спадабалася.
![](/3/images/news/2020/12/12671/2020-12-29-konkurs_batleek_20_24.jpg)
Пасля падліку галасоў першае месца заняла сям’я Коман. Другое — сям’я Курыловіч і трэцяе — сям’я Шулья.
Але, як сказаў ксёндз пробашч Станіслаў Мжыглуд SDS, кожны ўдзельнік конкурсу — пераможца, бо ў кожную працу было ўкладзена нямала часу, працы і творчасці.
Паглядзець фота батлеек, прадстаўленых на конкурс, можна на парафіяльным сайце Waladarka.by.